“Ha’u foin simu informasaun Amo Papa Francisco iis kotu, iha minutu ruma liu ba. Ita katóliku, maibé la’ós katóliku de’it, relijiaun hotu-hotu, umanidade tomak lakon boot. Papa Francisco, Papa ida ké impaktu klean liu iha istória mundo no iha istória instandarte,”dehan Horta, iha Pajina Prezidensiá Repúblika ne’ebé Online INDEPENDENTE sita segunda ne’e (21/04/25).

Xefe Estadu dehan, Papa Francisco, Papa ida ne’ebé haku’ak kiak no fraku sira, Papa ida ne’ebé la tauk ko’alia kontra poder mundiál no ko’alia kontra sira ne’ebé buka funu, la’ós buka dame.

Papa ko’alia mós kontra poder sira ne’ebé la hanoin ba kiak sira no sira ne’ebé hanehan rai fraku sira.

Tuir Prezidente Repúblika, Papa Francisco nu’udar intelektuál ida ne’ebé defende justisa.

Xefe Estadu mós sita Papa Francisco nia liafuan bainhira hala’o vizita iha Timor-Leste no atu fila hikas ba Vatikanu Roma, iha loron 11 fulan-Setembru tinan 2024.  

“Ita hotu-hotu lembra Amo Papa nia vizita mai iha Timor-Leste, iha fulan Setembru liu bá, liafuan ikus molok Nia (Papa Francisco) atu tama ba aviaun, fila ba Roma, nia kaer ha’u (Horta) nia liman hatete, ‘Tau matan didiak ba povu doben Timor-leste’”.

Entretantu, Papa Francisco hakotu iis, iha Roma, Italia, iha loron 21 fulan-Abril, tinan 2025, iha oras tuku 07:35 dader, oras vatikanu. Papa Francisco hakotu iis ho idade tinan 88.