Tuir dadus ne'ebé Jornalista Online INDEPENDENTE asesu husi Diresaun Jerál  Administrasaun no Finansas iha Ministériu Obras Públika (MOP), foin lalais ne’e haktuir katak, vitíma eviksaun ne'ebé seidauk hetan sira nia direitu ba indimizasaun hamutuk 68.

Husi numeru ne’e kompostu husi suku Bekora uma-kain 54, Bidau Manu Mata uma-kain hitu, aldeia Moris Foun Suku Komoro uma kain tolu no Kuluhun iha uma-kain haat.

Enkuantu vitíma sira ne'ebé hetan ona sira direitu bá indimizasaun iha kapitál Dili hamutuk uma-kain 1.167, ne'ebé kompostu husi Ai-mutin uma kain 16 ho nia orsamentu $64.972.01, Bairo-Pite, aldeia Hudi-laran iha uma kain 35, Bairo-Pite Palásiu Prezidente uma-kain 59, Bairo Pinte besik Eskola UNPAZ uma-kain 15, Aldeia 20 Setembro suku Bebonuk uma-kain 77 no suku Bebonuk, aldeia Metin I ho II iha uma-kain 91.

Aleinde ne’e, vitima afetadu suku Bekora uma-kain 97 mak hetan indiminizasaun, Bidau Manu Mata uma-kain 15, Bidaun sengol uma-kain 64, Bidau Pasar Sengol uma-kain 27, Kampo Alor, aldeia Anin-fuik uma-kain 3, Komoro fomentu I iha uma-kain 136, Komoro Fomentu II iha uma-kain 278, Komoro Moris Foun Kasnafar uma-kain 20, Komoro Moris Foun Mota ninin 154, Komoro Moris Foun RMS 14, Kuluhun 48, Marconi 1, Maskarinhas Alto Balide 3 no Motael Drainajem section iha uma kain Ida.

Entretantu, vitima afetadu husi munisipiu ne'ebé hetan ona indiminizasaun mak uma-kain ida iha postu administrativu Kelikai, Munispiu Baukau, uma-kain 11 iha suku samalari-Baukau no uma-kain ida iha Suku Sanfuk, Munisipiu Kovalima.

Husi dadus ne'e, Orsamentu ne'ebé Ministériu Obras Públika liu husi Diresaun Jerál Administrasaun Finansas halo ona pagamentu ba vitíma afetadas sira hamutuk $8.077.257.48.