Pozisaun husi Vietnam ne’e hato’o husi Ministru Negosiu Estranjeiru interinu, Repúblika Sosialista Vietnam, Le Hoai Trung, durante reuniaun ho Ministru Negósiu Estranjeiru no Kooperasaun, Bendito dos Santos Freitas.
Vizita husi Ministru Bendito no delegasaun ba Vietnam ne’e atu priense kritériu ida husi Prezidénsia ASEAN 2025, hodi hato’o Timor-Leste nia profundu agradesimentu ba estadu- membru ASEAN sira, ba sira-nia apoiu ne’ebé fó ba Timor-Leste, tantu iha apoiu tékniku no polítiku iha prosesu preparasaun atu sai membru plenu ASEAN ba dala-11 iha Outubru ne’e, iha Malázia.
Durante enkontru ne’ebé realiza iha Hotel Pan Pacific, Sidade Hanoi, Vietnam, iha 16 Setembru ne’e, Ministru Bendito espresa ligasaun bilaterál ne’ebé forte ho Vietnam, tanba Vietnam nu’udar nasaun ne’ebé iha esperiénsia kona-ba konstrusaun estadu no koñesidu mós hanesan nasaun ida ekonómikamente vibrante no sai númeru 33 ekonómiku iha mundu.
Tuir Bendito, TL presiza aprende mós esperiénsia husi Vietnam iha área reforma jestaun administrasaun públika, reforma setór ekonómiku no governasaun.
Durante enkontru, foka mós ba futuru estabelesimentu mekanizmu koordenasaun polítika entre nasaun rua, nune’e kooperasaun bilateral ne’ebé iha bele estruturadu no orientadu ba área espesífiku hanesan investimentu no seluk tan.
“Ohin loron ita-nia vizita ida mai ita simu konfirmasaun husi MNE Interinu katak, sira prontu tebtebes atu servisu ho ita iha áreas oioin, liu-liu iha nível ministerial atu haree kona-ba prioridades ne’ebé sira bele halo ho ita, entermus intervensaun konjunta atu nune’e bele lori benefísius mai ita,” dehan Bendito, liu husi komunikadu imprensa ne'ebé Online INDEPENDENTE asesu, Kuarta (17/09).
Bendito dehan, ASEAN hanesan grupu rejionál ida ne’ebé forte no karaterizadu fortemente iha setór ekonómiku. Tan ne’e, bainhira Timor-Leste sai ona membru ASEAN, sei intensifika liu tan kooperasaun ho Vietnam iha area hanesan polítika-seguransa, ekonomia no sósiu-kultura, inklui mós setór sira ne’ebé ligadu ba dezenvolvimentu teknolojia, siénsia, edukasaun, saúde, no seluk tan.
Iha enkontru ne’e, MNE interinu, husu atu Governu Timor-Leste ho Vietnam bele servisu besik liu tan, nune’e iha pos-adezaun bele iha koordenasaun ba atividade ekonómika, polítika-seguransa no sósiu-kultural bazeia ba pilar importante tolu ASEAN nian.
Entretantu, iha enkontru ne’e, Ministru Bendito akompañadu husi Embaixadór Timor-Leste ba Vietnam, João Pereira, Diretora-Jerál ba Asuntu ASEAN, Elisa da Silva, no Diretór Nasionál ba Sudeste Aziátiku, Vânio Florival.