“Agora daudaun vasina anti rabies ita sufisiente hela, hodi atende ba ema sira ne’ebé mak asu tata,” afirma Xefe Departamentu Imunizasaun Ministériu Saúde, Maria Angelina Pereira, hato’o asuntu ne’e ba Jornalista sira iha nia kna’ar fatin, Kaikoli semana kotuk ne’e.

Tuir nia, vasina anti rabies sufiente tanba Governu Timor Leste servisu hamutuk ho parseiru  Organizasaun Saúde Mundiál (OMS), UNICEF nune’e sira nafatgin suporta mós husi Embaixada Indonezia iha Timor-Leste.

 “Ita-nia stock agora daudaun iha INFPM ne’e hamutuk 1.525, maibé iha doasaun Índia mós haruka mai ona, totál hira mak ita seidauk hatene depois mak ita bo'ot sirakonfirma ho INFPM hodi esplika di'ak liu tan,” nia esplika.

Nia dehan, kazu pozitivu raiva mosu nafatin iha Munisípiu hitu hanesan Rejiaun Administrativu Espesiál Oecusse Ambeno, Bobonaru, Likisá, Ermera, Manufahi, Manatuto no Kovalima.

“Munisípiu hitu ne’ebé afetadu stock vasina anti rabies sufisiente iha sira nia fatin, atu nune’e bainhira asu tata ema tenke simu lalais vasina refere, agora Munisípiu seluk ne’ebé mak seidauk iha kazu ne'e’e INFPM mós distribui ona vasina ba sira nia fasilidade saúde atu nune’e kazu ne’ebé mak asu tata sira direitamente sona,”nia haktuir.

Molok ne'e Diretór Interinu INFPM, Miguel Soares, hatete, kona ba ai-moruk raiva iha Munisípiu sira ne'ebé mak hatama pedidu barak liu mak Munisípiu haat ne'ebé mak identifikadu risku ba virus Rabies.

"Iha ne'e Munisípiu ou área ne'ebé ke ninia pedidu tama barak liu mak Maliana, Suai, RAEOA inklui Ermera ne'e rasik área haat ne'e mak sira nia pedidu tama maka’as," nia subliña.