Xefe Suku Lauala, Tomé de Deus informa, komunidade balun iha suku refere seidauk asesu eletrisidade no nafatin moris iha kondisaun nakukun, liu-liu iha área remotas sira.

“Eletrisidade to’o ona iha aldeia tolu, maibé bairu rua iha Aldeia Erlebihat seidauk asesu. Agora daudaun uma-kain 89 mak seidauk hetan eletrisidade,” dehan Tomé de Deus ba Jornalista INDEPENDENTE liuhusi telefone, Kinta (05/03).

Nia esplika, iha suku Lauala, eletrisidade tama ona iha Aldeia Nona-Bite no Sari, maibé komunidade balun iha Aldeia Erlebihat seidauk hetan asesu ba servisu refere.

Tanba ne’e, nia husu ba Ministeriu Obras Públikas (MOP) atu tau atensaun liu tan ba komunidade sira iha área remotas, atu rezolve problema eletrisidade ne’ebé komunidade sira hasoru durante tinan barak.

“Ita ukun an ona tinan 24, maibé to’o agora komunidade barak liu-liu iha área remotas seidauk asesu ba eletrisidade. Tanba ne’e husu ba Governu atu kontinua tau interese ba komunidade sira ne’ebé seidauk hetan servisu ne’e,” dehan nia.

Iha parte seluk, Reprezentante povu iha Parlamentu Nasional (PN) mós hato’o preokupasaun hanesan kona-ba komunidade sira iha área remotas.

Vise Bankada Khunto, Luis Roberto da Silva hatete, komunidade iha aldeia neen iha Suku Maina 1 no Maina 2, Postu Administrativu Lautem, Munisípiu Lautem, mós seidauk asesu ba eletrisidade.

“Ita-nia povu moris ona ho liberdade no independénsia tinan barak, maibé komunidade sira iha área remotas nafatin preokupa tanba seidauk asesu ba eletrisidade,” dehan nia iha plenária Parlamentu Nasional.

Nia hatutan katak aldeia 6 iha zona Alto Laleno, ne’ebé uluk sai baze ba gerileiru sira, to’o agora populasaun nafatin uza kamii no ahi tradisional bainhira kalan.

Tuir nia, iha tinan 2015, autoridade lokal hamutuk ho veteranu sira submete ona proposta ba MOP atu instala eletrisidade iha área refere.

Iha 2018, kompaña ida mobiliza ona material balun hanesan ai-rin, maibé to’o agora seidauk iha serteza kona-ba implementasaun projetu ne’e.

“Ita la hatene bainhira loos mak atu instala eletrisidade ba komunidade sira iha aldeia neen. Ita mós seidauk haree projetu ne’e iha lista projetu anterior sira,” dehan deputadu ne’e.

Tanba ne’e, Bankada Khunto husu ba ministeriu relevante atu aselera prosesu instalasaun eletrisidade, nune’e komunidade sira iha bele hetan servisu hanesan ho área seluk iha rai-laran.