Iha julgamentu fó sai katak HSJ nu’udar na’in ba Yi Pin Jia 08 Agencia Unip. Lda. Empreza ida ho nia diresaun iha Hudi Laran, Aldeia Teki-Teki, Suku Bairo Pite, Postu Administrativu Dom Aleixo, Munisipiu Dili.
Empreza ne’e harii 10 Maiu 2019, ho nia objetivu atu trata dokumentu ka vistu ba traballador Xinesne'ebé tama no servisu iha Timor-Leste.
Bazeia ba akuzasaun, arguida falsifika dokumentu ofisial balun, inklui sertifikadu rejistu kriminal, ho maneira muda loron emisaun dokumentus. Iha inisiu hakerek 13 Juñu 2022, maibé apaga no troka fali ho data seluk.
Aleinde ne’, arguida mós falsifika dokumentu husi loza Maubisse Unip.Lda. no karimbu Inspesaun Jeral Trabalhu (IJT), no autorizasaun vistu traballu. Falsifikasaun ne’e halo hodi altera identifikasaun LY ba fali CW hodi justifika ba Diresaun Assuntu Konsellu Ministeriu Negosiu Estranieiru no Kooperasaun hanesan pareser favoravel ba vistu fixasaun rezidensia nian.
Iha julgamentu ne’e fó sai mós katak, arguida konsege produs karimbu falsu hamutuk 107.
Tuir faktu ne'ebé indika iha autus konfirma katak, arguida sempre falsifika dokumentu sira deskrita ho propriu arguida nia ekipamentu ho forma repetidu.
Arguida aproveita situasaun ne'e hodi inventa, produz no emite dokumentu Estadu nian hodi bosok no fasilita sidadaun Xineza sira hodi hetan vistu traballu no vistu fixasaun rezedensia, hodi halao atividade negosiu no permanense iha Timor-Leste.
Hatan ba akuzasaun ne'ebe iha, arguida deklara katak, faktus ne'ebé iha loos hotu.
Arguida deklara, halo aktu ida ne'e tanba la hatene aktu ne'e kontra lei, tanba ho ansi, lakohi lakon nia kliente, no labele hetan multa husi Estadu,mak arguida pratika aktu ne'e.
Arguida deklara, nia halo duni rejistu kriminal falsu, karimbu falsu, atestadu mediku falsu, asinatura ne’e nia mak asina rasik, tanba nia kliente sira-nia dokumentus mai iha tempu ne’ebé badak loos ona, nune’e nia halo ida ne’e atu labele hetan multa.
Arguida rekoñese nia hahalok ne'e la di’ak no promete sei la halo tan aktu ne'e iha futuru.
Rona tiha arguida, iha faze alegasaun Prokurador Aderito Tilman husu Tribunal tetu atu aplika pena ba arguida tuir modura husi krime ne’e.Enkuantu husi parte defeza, Juvinal Dias, husu Tribunal tetu atu aplika pena suspensaun ba arguida.
Rona tiha alegasaun, Tribunal adia julgamentu ba 1 Fevereru, tuku 11, hodi rona desizaun.
Audensia julgamentu ne'eprezide husi Juiz kolektivu José Escurial, Fransisca Cabral, no Juiz Estajiadu na’in ida. Ministeriu Publiku reprezenta husi Prokurador Aderito Tilman, no arguidu hetan asistensia legal husi Defensor Publiku, Juvinal Dias.