“Ohin ita halo serimonia despedida ba traballadór sira atu ba Korea iha loron 16 juñu sira aranka ona no traballadór hirak ne’e iha feto na’in ida,” dehan Xefe Gabinete SEFOPE Jacinto Ribeiro Dias, iha Salaun Timor-Lodge, Komoro, Sesta ne’e (13/06/25).

Nia dehan Traballadór na’in 54 ne’e sei ba servisu iha área peskas, agrikultura, no mós fabrika, ho durasaun tinan haat (4), fulan 10.

Nune’e, SEFOPE husu ba traballadór sira atu nafatin kumpre regras ne’ebé nasaun rua estabelese ona no labele halai sai husi sistema no mós husu ba traballadór sira bainhira servisu tenke rai osan ho diak atu bele halo buat sustente familia.

“Ita fó mensajem ba sira katak nafatin kumpri ba sistema ne’ebé Governu rua halo kria ona, ita tenke lori ema ne’ebé mak ba servisu ho responsabilidade, tanba ne’e husu nafatin mantein sistema la bele sai husi sistema, tanba banhira ita sai husi sistema, sai mós implikador ba empregadór sira,”Tenik nia.

Iha fatin hanesan traballadora Leonilda Fernandes,  agradese ba Governu, tanba fó ona oportunidade ba nia atu servisu iha korea durante tinan haat fulan 10.

“Ha’u agradese ba Governu, tanba ha’u nia feto maluk barak hakarak hetan oportunidade hanesan ha’u, maibé  to’o agora sira la hetan, entaun oportunidade ida ne’ebé ha’u hetan atu ba servisu iha Korea durante tinan haat fulan 10 iha área  fabrika nian,” Leonilda Fernandes, informa.

Nia dehan, servisu saida deit sempre iha dezafiu, maibé ida ne’e la hamate vontade sira nian, nafatin hasoru no fiar katak hakat neneik atu bele hadia ekonomia familia nian.

Nune’e mós, traballadór Moises da Silva, agradese ba parte hotu ne’ebé fó ona oportunidade atu sira ba servisu iha Korea.

“Ami agradese ba parte hotu ba prosesu sira ne’ebé to’o mai iha etapa ohin loron no husu ita boot sira-nia suporta mai  ami, atu servisu diak iha ema nia rain,”hakotu nia.