PM Xanana hatete, lansamentu dezeñu ida ne'e nu'udar kondisaun ida mós ba Timor-Leste ninia dezaun ba ASEAN. Tanba bainhira TL sai membru plenu ASEAN, TL mós sei sai uma-na'in ba enkontru bilaterál sira liga ho ASEAN.

"Ita haree ba haree mai ita iha ona Portu Tibar. Iha ne'e ita haree ba iha kedas sentral ita-nia rai ninian, dala-ruma ita temi ekonomia Azúl mais sira uza ropa Azúl ne'e mós la hatene saida mak ekonomia Azúl, ne'ebé agora ita atu la'o ba ekonomia Azúl.”

“Ho hanoin ida ne'e mak hakarak atu hadi'a fatin ne'e hodi hatudu katak Timor buka la'ó ba oin. Tanba agora to'o ASEAN ita tenke iha preparasaun ba simu, banhira ita sei kaer Prezidensiál ASEAN nian, ema sei mai iha ne'e hodi halo reuniaun, ida ne'e kondisaun ida," dehan PM Xanana hafoin lansamentu, Kuarta (24/09).

Tuir PM Xanana, iha 2029 Timor-Leste sei sai prezidensiál ba ASEAN, nune'e presiza prepara ona kondisaun no hahú konstrusaun nune’e iha 2028 konstrusaun ne'e remata no bele utiliza iha 2029.

"Agora Malázia mak Prezidensiál ba ASEAN, depois tinan 2026 Meymar, 2027 Singapura, 2028 Tailándia, no 2029 Timor-Leste. Ho ida ne'e mak ita prepara kondisaun ida ne'e hodi hahú ona, no 2028 bele remata ona konstrusaun ba ida ne'e," deklara Xefe Governu ne’e.

Nia hatutan, konstrusaun Sentru ne'e la'ós de'it tanba TL atu sai membru plenu ASEAN nian maibé mós atu hadi'a no halo netik buat di'ak ruma ba rai ida ne'e.

Enkuantu prevee ba zona portu tuan, iha baía Díli nia sorin, empreendimentu sei sai hanesan marka arkitetóniku no símbolu transformasaun nasionál, liuliu iha kontestu integrasaun ba ASEAN.

Kompleksu ne’e sei inklui edifísiu prinsipál ba Sentru Internasionál Konvensaun, ho sala konferénsia, auditórius no pavillaun espozisaun nian, nune’e mós áreas komplementáres lazer no turizmu nian, inklui paseiu ida hodi la’o iha kais nia sorin, akuáriu ida no sentru entretenimentu no komérsiu ida.

Objetivu husi projetu ne’e mak atu revitaliza kapitál nia tasi-ibun no halo Dili sai destinu ba eventu internasionál boot sira, hodi promove turizmu, hasa’e ekonomia no kria oportunidade foun ba komunidade lokál.

Kordenador Jerál, Ministériu Koordenadór ba Asuntu Ekonómiku no Turizmu Ambiente,  Jorge de Carvalho Martins hatete, konstrusaun ida ne'e uza area portu Dili atu responde mós roteiru ba ASEAN nia kona-ba asuntu infraestrutura.

"Entaun nesesita duni governu Timor-Leste atu iha infraestrutura ida ke iha estandar internasionál ida par bele konvoka reuniaun ASEAN sira no bele sai uma-nain ba reuniaun importante sira ASEAN nia."