Tuir sasin ida, iha Domingu (25/05) bainhira komunidade balun atu ba hili fatuk, nia rona bebé tanis. Bainhira hakbesik an ba, haree katak bebe ida iha sakola laran, ho nune’e ema ne’e lori nia faru hodi falun bebe refere.

“Bebé ne'e kondisaun di'ak hela. Lori mai tiha uma mak kontaktu OPS hodi ba haree. Depois mak lori kedas ba ospitál Likisá hodi halo tratamentu," informa fonte ida, foin lalais.

Ba kazu ne’e, Sekretária Estadu Igualdade (SEI), Elvina Sousa lamenta tanba hafoin esforsu ne'ebé halo husi parte Igreja, Governu no parte sosiedade sivil atu hamenus ka halakon aktus soe bebé ne'e, inan-aman iresponsabilidade balun kontinua soe bebe.

SEI ne’e fiar katak autoridade seguransa, liu-liu Apoiu Pesoál Vulneravel, hala’o hela sira-nia servisu.

“Investigasaun ha'u fiar katak la'o hela, sira sei hatene ka hetan autor ne'ebé ba soe bebé ne'e," dehan Elvina iha Parlamentu Nasionál, Segunda (26/05).

Aktu soe bebé ne’e, tuir nia, nu’udar aktu krime, tan ne’e see de’it mak komete tenke ba hatan iha justisa.

"Ita mós tenke haree halo investigasaun ne'ebé klean tanba dala-barak mós labarik sira ne'ebé soe bebe dala-ruma mai husi insestu no dala-ruma mós mai husi violensia seksual ne'ebé mak akontese ba sira, dala-ruma mós mai husi relasaun namora ne'ebé la saúdavel, relasaun ne'ebé ita bele dehan katak rezulta bebé ne'e la'os rezultadu ne'ebé mak sira hakarak," nia dehan.

Ba kazu soe bebé iha Likisa, SEI ne’e dehan, tuir informasaun, bebé ne’e moris hela.

"Ha’u mós rona labarik ne'e moris hela, ne'e grasas a Deus, mais ha'u hatene katak ita-nia sistema forte tebes atu proteze labarik ne'e, ha'u hatene Ministériu relevante, Ministériu Solidariedade Sosial mós iha no Ministériu Justisa, par hodi proteze no fó seguransa sosiál ba labarik ne'e."

SEI nafatin husu ba parte relevante sira atu halo serbisu ho di'ak, liu-liu ba dahuluk atu asegura bebé ne'e ho di'ak.