Xefe Estadu dehan, nia aseita ho hanoin husi Primeiru Ministru, Kay Rala Xanana Gusmão, ne’ebé hakarak taka Empreza Públiku no Institutu Públiku ne’ebé gasta osan arbiru de’it.
Governu, nia dehan, seidauk aprezenta proposta ruma ba nia relasiona ho kestaun ne’e. Maibé se governu aprezenta, nia sei taka matan hodi asina.
"Se governu lori proposta lei mai, ha'u halo kedas promulgasaun, ha'u taka matan tiha depois asina kedas,” dehan Xefe Estadu ne’e ba jornalista sira bainhira partisipa iha eventu Fulan Mundiál Saude Orál, iha Kantina Matak Palásiu Prezidensiál Bairu-Pite, Tersa (25/03).
PR Horta hatete, nia aseita 100% atu taka tiha EP no IP tanba EP no IP iha Timor-Leste barak demais.
"Ha'u konkorda taka IP no EP, tanba Empreza Públika iha rai doben ida ne'e barak demais. Governu sira anteriór, polítiku sira mak inventa tuun-sa'e Institutu Públika no Empreza Públika."
“Institutu Públika iha rai seluk iha, maibé bainhira bolu Institutu Públika ida, Institutu ne'e nia rasik mak hatene halo hatama osan. Tanba hatama osan boot, entaun tenke halo jestaun nu'udar empreza komersiál ida.”
"Ha'u koñese Direitór Empreza Públika balun iha rai li'ur ne'ebá, iha Portugál, ema sira ne'e manan osan tanba sira hatama billaun dollar. Ita nian la'e, nein doit metan ida, eletrisidade sira la hatene kaer. Eletrisidade EP ne'e estraga ema-nia sasan, komputadór, mákina ospitál nian mós estraga," dehan PR Horta.
Molok ne’e, Primeiru Ministru, Kay Rala Xanana Gusmão, konsidera Institutu Públiku no Empreza Públiku ne’ebé governu kria barak mak gasta osan estadu arbiru de’it no la hatudu rezultadu servisu.
Ho nune’e, Xefe Governu ne’e deklara, governu ne’ebé nia lidera sei taka Institutu Públiku (IP) no Empreza Públika (EP) ne’ebé mak gasta de’it osan estadu nian, maibé laiha rezultadu servisu.
“Ha’u kontente tebtebes tanba ami parova ona Dekretu Lei ida hodi book daudaun ona EP no IP sira. Horseik iha reuniaun Konsellu Ministru ami hasai ona Dekretu Lei ida, ha’u informa ona ba Prezidente Repúblika atu promulga,” dehan PM Xanana hafoin enkontru semanal ho Prezidente Repúblika, José Ramos Horta, iha Palásiu Prezidente Nicolau Lobato, Bairru-Pité, kinta (20/03), ne’ebé INDEPENDENTE sita husi komunikadu imprensa husi pajina ofisial PM Xanana.
Nia dehan, maske IP no EP sira ne’e tutela ba Ministériu ida, maibé labele intervein tanba sira iha autonomia administrativa finanseira no ida ne’e mak halo sira gasta osan millaun bá millaun arbiru de’it no rezultadu laiha.
Problema boot ne’ebé hamosu gasta osan povu nian arbiru mak mentalidade, tanba ne’e iha reuniaun ida iha Ministériu Finansas, PM Xanana hatete, nia husu ba responsável sira atu lalika tauk halo auditoria interna hodi bolu atensaun.
PM Xanana nota katak IP no EP ne’ebé gasta osan barak liu mak Ajénsia Dezenvolvimentu Nasionál (ADN), Komisaun Nasionál Aprovizionamentu (KNA), Eletriidade Timor-Leste (EDTL), no Bee Timor-Leste (BTL).