Sua Eminénsia Dom Virgílio Kardeál do Carmo da Silva hatete, hafoin uma kreda selebra tiha tempu kuaresama no paskoa ho tempu ne'ebé mak naruk no ohin sarani iha Katólika komemora loron Korpu de Deus.

“Ha'u hanoin ita selebra tiha tempu hahú kuaresma  mai paskoa ho tempu naruk, bainhira ita taka iha semana kotuk ka domingu kotuk ita festa Santima Trindade no ohin ho Korpu de Deus.  Mensajen furak ida ba ita mak ida-ne'e Jesus mai terus mate fila fali, maibé nia husik hela buat ida ba ita, husik hela ba ita mak saida Eukaristia.  Eukaristia mak sai ninian prezensa ne'ebé mak nafatin hela hamutuk ho sarani sira, entaun ida ne'e selebra hodi fó hanoin ba sarani sira katak los duni Jesus moris hikas fila-fali nia sa'e ba lalehan, maibé prezente bo'ot ida ne'ebé mak marka nafatin nia prezensa,” Dehan Kardeál Vergilio ba Jornalista sira, iha Largo Lisidere, Kinta (04/06).

Nia dehan, prezensa katak  la'o hamutuk ho sarani sira dala ne'ebé real katak nia prezensa moris duni.

"Iha prezensa ita nia leet mak eukaristia, atu eukaristia tiha ne'e sarani sira kontínua rona nia liafuan simu nia fiar isin ida-ne'e hodi kontínua haburas nafatin sira ba fiar tan ne'e mak festa ida ne'e iha nia sentidu furak ida. Ita hanoin kona-ba Maromak fó ninian nu'udar ai-han, maibé ai-han ida ne'ebé ita simu ida ne'e halo ita atu kontínua sai ida de'it ho nian,” Nia informa.

Nia  hakutir, hanesan ohin  sarani sira komunga kristu nia isin no Kristu nian sai ida de'it ho sarani sira.

“Hanesan ohin ha'u dehan ne'e ita komunga Kristu nian isin no kristu ne'e sai ida de'it ho ita, bainhira ita atu sai hanesan ninian illas, segundu nian illas ne'ebé mak iha ita ne'e halo ita mós hatene no kontínua trata ema seluk hanesan nafatin Maromak nian ilas lolos, ida-ne'e provoka ita atu halo saida hadomi ita nian an no hadomi ita nia maun alin sira nu'udar Kristu rasik horik ho ita no tan ne'e mak festa Korpu de Deus ne'e festa furak ida no festa ida ne'ebé mak marka unidade, komiñaun entre sarani ho nian Maromak i sarani ho sarani,” Nia esplika.