Rui subliña katak nia lakohi fó komentáriu diretamente kona-ba polémika ne'e.Maibé, nia orienta públiku no kuadrus partidu nian atu refere ba regulamentu internu Fretilin nian.
“Ha’u lakohi atu tama iha polemika ida ne’e. Se hakarak bele haree Estatutu Fretilin nian, versaun 2023, artigu 14º, númeru 13º,” dehan nia via WatsApp, Kinta (09/04).
Estatutu subliña lisensa ofisial ba kandidatura
Bazeia ba Estatutu Fretilin 2023 ne’ebé Jornal INDEPENDENTE asesu, espesifikamente Artigu 14, númeru 13, kona-ba ‘Deveres’, hatete katak:
‘Labele sai kandidatu ba pozisaun ruma, reprezenta partidu ka organizasaun sira seluk ne’ebé asosiadu ka dependente ba sira, la ho autorizasaun eskrita loloos husi Komisaun Polítika Nasionál Komité Sentrál nian’ (Não ser candidato para qualquer função, por outros partidos ou organizações associadas ou deles dependentes, sem a devida autorização por escrito da Comissão Política Nacional do Comité Central).
Molok ne’e, Sekretáriu Jerál Partidu Fretilin, Mari Alkatiri deklara, Partidu Fretilin sei determina figura ida hodi kandidata ba Prezidente Repúblika ba períodu 2027–2032 liu husi desizaun Komité Sentrál Fretilin.
Tuir Alkatiri, desizaun kona-ba kandidatu prezidensiál laos iha nia liman, maibé kompeténsia membru Komite Sentral Fretilin (CCF) sira ne’ebé sei tuur hamutuk hodi halo desizaun.
"La'ós ha'u mak deside see mak kandidatu, ne'e Komité Sentrál Fretilin mak sei deside," dehan Alkatiri ba jornalista sira, hafoin Komisaun D hala'o konsulta, iha edifisiu eis Titulár, Faról, Kuarta (08/04).
Iha oportunidade ne’e, Alkatiri mós hato’o mensajen klaru ba sira ne’ebé hakarak sai kandidatu independente, liu-liu kona-ba ‘kartaun partidu’.
"Ha'u husu de'it sira kandidatu independente ne'e entrega kartaun. Se independente duni, entrega kartaun, la'ós kaer metin kartaun,” dehan nia.
Sekjer Fretilin ne’e hatutan, nia laiha problema atu simu ema ne’ebé entrega ninia kartaun partidu, tanba, tuir nia hanoin, funsaun Xefe Estadu no lider partidu nu’udar buat rua ne’ebé diferente.
“Se entrega kartaun, ha'u simu. Ba ha'u sai Prezidente ka Sekretáriu Jeral Fretilin buat ida, sai Xefe Estadu buat seluk," katak nia.
Alkatiri mós esplika katak Fretilin iha kuadru barak ne’ebé prontu atu sai kandidatu, ne’ebé hatudu katak partidu ida ne’e forte ho ema matenek no kapasidade aas.