Ministru Obras Publika (MOP), Samuel Marçal informa, Ministériu ne’ebé nia lidera ezekuta orientasaun husi Primeiru Ministru (PM), Xanana, hodi halo alargamentu ba estrada protokolu, hahú husi ponte B.J. Habibie, Lecidere to’o Bekora.
Iha razaun tolu ba alargamentu estrada refere. Razaun dahuluk mak projetu estrada ne’e hanesan projetu integradu no projetu pilotu ne’ebé foin ba dauluk Governu dasia halo iha Timor-Leste (TL) mak planu ba underground electrical cables.
Ida ne’e katak governu hahú hakoi fiu eletrisidade sira iha rai okos hodi fó espasu mamuk iha rai leten no hadi’a imajen sidade nian.
“Agora daudaun fibra óptika seidauk mai tan Dili laran fiu sabraut ona, sa tan aban-bainrua kuandu fibra óptika to’o mai. Tanba ne’e mak ita-nia esforsu ida sei hakoi fiu sira ne’e ba rai okos.”
“Maske nasaun kiik-oan, maibé pelu menus iha dalan protokolu sira ita hakoi fiu sira ba rai okos atu halo sidade ne’e bonita," dehan Ministru Samuel liu husi komunikadu imprensa ne’ebé INDEPENDENTE asesu, Tersa (01/04).
Razaun daruak mak governu loke estrada ho metru 24 ba sorin-sorin tanba daudaun uma ne’ebé mak komunidade sira konstrui iha área estrada ibun ho medida semi permanente no ninia indemnizasaun ne’e kamán ka ho kutsu ne’ebé kiik.
Bainhira Governu husik to’o komunidade barak konstrui uma ho medida permanente no aban-bainrua foin atu sobu, Governu sei halo indemnizasaun ho kustu ne’ebé mak boot tebes.
Husi ne’e mak Governu sei hahú kria kondisaun ba tinan 20 oin mai bainhira akontese engrafamentu bele halo ona Flying Road ne’ebé fasil tebes no laiha problema tanba espasu iha ona.
“Tanba ne’e mak planu halo alargamentu estrada metru 24 ne’e mai ho vizaun ida ne’ebé hateke ba dook,” dehan Ministru ne’e.
Razaun datoluk mak Governu halo alargamentu estrada ida ne’ebé tuir padraun ba urbana, liu-liu ba trosu nasionál ne’ebé tama iha kapitál Díli.
“Ida-ne’e mak razaun fundamentál tolu atu halo alargamentu ba estrada iha Dili laran, liu-liu iha área Bekora nian agora daudaun.”
Iha sorin seluk, Xefe Planeamentu MOP, Tito Edgar esplika, tuir planu MOP nian ba alargamentu estrada ne’e iha típiku tolu.
Alargamentu estrada pista rua husi área Kuluhun nian to’o estasaun Polísia Bekora típiku ida ho alargamentu estrada luan metru 24. Husi estasaun Polísia Bekora ba estádiu Futeból Bekora típiku ida ho lu’an metru 24, no husi Estádiu Futeból ba to’o terminál Bekora típiku ida ho medida alargamentu estrada metru 38, tanba kompleta kedan ho estasionamentu públiku.
“Husi típiku tolu ne’e mak ita kria duni kondisaun ba aban-bainrua bainhira mosu engrafamentu, ita bele halo Flying Road tanba espasu iha ona,” dehan Xefe Planeamentu MOP ne’e.
Tuir nia, planu ne’e MOP implementa ho estudu kle’an husi enjeñeru sira ne’ebé halo ona kalkulasaun klara ba estudu viabilidade ka estudu transporte nian tanba kada tinan importadór transporte roda haat ne’ebé tama mai Timor-Leste liu unidade rihun 10.
Oras ne’e daudaun MOP servisu maka’as hela durante fulan tolu nia laran hahú husi Abríl to’o Juñu iha área estádiu futeból Bekora nian, nune’e bele utiliza iha realizasaun jogu CPLP edisaun 12 ne’ebé sei hala’o iha Dili, husi 17 to’o 25 Jullu 2025.