“Maske prosesu investigasaun konklui no haruka ona ba Ministeriu Publiku, maibé to'o agora seidauk iha kontinuasaun ba prosesu sira ne’e,” informa Komisariu Adjuntu KAK, Rosario Araujo bainhira sai orador ba programa sensibilizasaun no prevensaun iha Munisipiu Lautem foin lalais.

Durante sensibilizasaun partisipante sira hato’o kritika makas kona ba kazu ró Haksolok ne’ebé fo prejuiju boot ba orsamentu estado nian.

Partisipante sira konsidera KAK halo diskriminasaun iha implementasaun Lei nu. 7/2020 kona ba Medidas Prevensaun no Kombate Korrupsaun (MPCC), tanba la brani halo investigasaun ba ukun na'in sira iha nasional, maibé brani de’it ba funsionariu ki’ik sira iha munisipiu.

Hatan ba kritika ne'e, Komisariu Adjuntu KAK hateten, Lei Nu. 7/2020 kona ba Medidas Prevensaun no Kombate Korrupsaun implementa ba ema hotu hanesan, la hare ba nia ema bo’ot ka ki’ik no laiha diskriminasaun.

"Iha rai ne’e KAK la tauk ba kualker pesoal no bainhira komete krimi korrupsaun KAK sei implementa Lei Nu. 7/2020,” haktuir Komisariu Adjuntu KAK liu husi husi komunikadu ne’ebé Jornálista INDEPENDENTE asesu, (13/08).

Nia haktuir, kazu ró Haksolok KAK hetan delegasaun husi Ministeriu Publiku iha tinan 2021 hodi halo investigasaun, inklui projeitu 32 iha RAEOA.

" Bainhira terseira mandatu Komisariu KAK remata no kargu komisariu iha vakum laran, investigador sira entrega fla fali rezultadu investigasaun ba Ministru Publiku nu’udar nain ba asaun penal," nia informa.

Tanba ne'e, iha fim Dezembru 2023, KAK relata kazu hirak ne'ebé prosesa iha KAK ba Ministeriu Publiku, inklui relatoriu no dokumentus suporta sira.