Koordenador EBF Mota Ulun, Domingos Sarmento informa, eskola ne’ebé nia lidera hasoru problema sala aula ne’ebé la sufisiente.

Husi total sala aula ualu (8), parte eskola utiliza de’it sala aula lima (5), tanba sala aula rua (2) mak hahú dodok ona.

"Ami koko hadia atu uza ba turnu rua, maibé la to'o fulan rua sala-de-aula ida aat fila fila, entaun ami tenke lao ho turnu tolu,” dehan Domingos ba Jornalista Jornal INDEPENDENTE, Iha nia kna'ar fatin, Segunda (20/10).

Nia esplika, turnu tolu ne’e fahe ba parte dader no loraik. Iha dader tuku 7:30 to’o 10 ba 1 no 2 ano; tuku 10 to’o 12:30 ba 3 no 4 ano; no iha loraik ba estudante 5 no 6 ano.

Domingos hatete, nia parte dala-barak ona hato’o proposta ba parte edukasaun munisipiu Dili maibé to’o ohin seidauk iha resposta pozitivu.

“Gracas a Deus iha ekipa ida husi Amerika mai haree atu hadia, maibé seidauk iha rezultadu," dehan nia.

Aleinde ne’e, nia dehan, eskola ne’e hasoru mós problema moru protesaun, ne’ebé la’os de’it proteje eskola refere husi mota iha tempu udan, maibé mós atu asegura eskola nia sasan.

"Ami-nia eskola ne'e lokaliza hela iha mota ibun, no ami-nia estudante sira mós mai husi Aldeia Bekae, sira mai eskola liu de'it husi mota laran, entun eskola laiha moru protesaun atu asegura estudante sira iha tempu udan."

Bainhira iha foho leten udan loron rua tuituir malu, mezmu iha Dili la udan, parte eskola tenke hapara ona prosesu aprendizajen.

"Ami-nia moru protesaun laiha, ida ne'e perigu tebes ba estudante sira iha tempu udan, tanba ita-nia eskola lokaliza hela iha mota ninin, nune'e atu asegura estudante sira husi korente mota nian mak bainhira kalohan nakukun ami tenke haruka estudante sira fila ba uma, maske oras seidauk to'o," Domingos dehan.

Aleinde proteje eskola husi mota, nia dehan, moru protesaun ne’e mós atu bele garante seguransa ba eskola.

Tanba, nia dehan, iha tempu kalan ema balun tama livremente hodi naok eskola nia sasan.

Kona-ba númeru manorin, Koordenadór ne’e dehan, sufisiente, maibé problema mak manorin balun nia kondisaun dala-ruma la permite atu sira bele mai hanorin.

"Ha'u fó ezemplu profesor sira idade avansadu, entaun banhira kondisaun la favoravel sira la mai hanorin, maibe bainhira di'ak sira foin mai hanorin.”

Ho nune’e, Koordenador ne'e hein katak ba futuru Ministeriu Edukasaun bele koloka manorin foun ba eskola refere.

"Daudaun ne'e ami-nia profesor na'in 10 mak rejistu ona iha Komisaun Funsaun Publika no ba tinan oin sira na'in 10 ne'e sei tama ba reforma," katak nia.

Total estudante iha EBF Mota Ulun hamutuk na’in 560.

Entretantu, to’o notisia ne’e públika, Jornalista Jornal INDEPENDENTE seidauk konsege konfirma ho parte Ministériu Edukasaun.