Fernanda Lay esplika, Konsellu Superiór Majistratura Portugál, prontu atu tulun iha prosesu selesaun ba juis sira ba Supremu Tribunál Justisa (STJ) Timor-Leste nian.

“Mensajen saida mak Prezidente hato'o iha momentu antes ha'u ba, ha'u hato'o, no Portugál prontu neste momentu Supremu Tribunál Portugál nian atu fó apoiu iha selesaun juis ita nian," dehan Fernanda Lay ba jornalista sira, hafoin hasoru-malu ho PR Horta, iha Palásiu Prezidensiál Bairu-Pite, Segunda (27/04).

Nia hatutan, prosesu selesaun judisiáriu ne’e sei involve Konsellu Superiór Majistradu, ne’ebé sei hili kandidatu atu halo selesaun.

Prosesu ne’e sei hala’o husi komisaun espesiál ida ne’ebé estabelese iha ámbitu Parlamentu Nasionál, ho reprezentante husi prezidénsia no parlamentu.

Tuir Fernanda, Governu portugés laiha objesaun atu fó asisténsia, inklui haruka peritu sira hodi ajuda iha selesaun no avaliasaun ba juis sira.Maski nune’e, kustu ba peritu sira ne’e Timor-Leste mak sei responsabiliza.

"Instalasaun Supremu Tribunál Justisa ne'e ita prevee ba antes fim do ano tanba komisaun ne'e ba tinan ida nian," katak nia.

Molok ne’e, durante vizita ofisiál ba Lisboa iha 15 Abril 2026, Fernanda hasoru malu ho Prezidente Konsellu Judisiáriu Portugál nian, João Cura Mariano, hodi ko’alia kona-ba koperasaun iha setór justisa nian, liu-liu iha rekrutamentu no nomeasaun ba juís sira.

Nia realsa, harii Supremu Tribunál nu’udar pasu importante ida hodi hametin sistema judisiál no konsolidasaun demokrasia iha Timor-Leste.

“Estabelesimentu husi Tribunál ne'e importante tebes tanba justisa hanesan esensiál ba prosesu konsolidasaun demokrasia nian no ba sidadaun tomak," katak nia.