Prezidénsia Repúblika liu husi Unidade Servisu Sosiedade Sivil no Asuntu Sosiál, hahú ona reuniaun preparativa ho konkorete sira husi Bairu, Aldeia, Suku no Postu sira iha Munisípiu Dili.

Sorumutu ne’e nu’udar pasu inisiu molok hahú prosesu konstrusaun prezepiu husi 15 to’o 27 Novembru 2025 iha area Palasiu Prezidensial.

Tuir komunikadu iha pajina ofisial Prezidensia Repúblika, Sesta (14/11), totál grupu kategoria sira ne’ebé rejistradu hamutuk 83. Husi númeru ne’e grupu adultu iha 64 no grupu labarik iha 19.

Inisiativa anuál ne’ebé promove direta husi Prezidente Repúblika, José Ramos Horta ne’e hetan nafatin apoiu masimu husi governu dasia. Liu husi kompetisaun ne’e, Prezidente hein katak jerasaun foun bele hala’o papél ativu iha edukasaun públika kona-ba sustentabilidade ambientál no kriatividade.

Kampaña redus lixu liu husi arte

Aleinde parte ida husi selebrasaun Natal, atividade ne’e mós lori mensajen importante kona-ba kestaun ambiental. Enkoraja partisipante sira atu utiliza material uzadu no produtu lorloron nian, nu’udar simbolu komitementu atu redus lixu.

“Motiva komunidade atu uza materiál reutilizavel husi produtu loron-loron, hodi hamenus volume lixu iha ambiente.”

“Selebra tempu festivál Natál ho valorizasaun elementu simbóliku tradisionál, enkoraja kriatividade no orijinálidade.”

“Dekora Palásiu Prezidensiál ho prezépiu partisipante konkursu sira-nian, ne’ebé sei halo espozisaun iha área Palásiu nian durante festa Natál,” anunsia palasiu PR.