Ba doutor sira, tuir PR Horta, iha suku sira profisional saude sira, liu-liu doutor laiha uma atu hela.

"Ha'u preokupa liu mós ba doutor sira iha suku sira. Tau doutor sira iha ne'ebá, (mais) uma mós laiha,” dehan dehan Xefe Estadu ba jornalista sira, hafoin vizita Z&Z Internasional School, iha Bebonuk, Sesta (07/11).

Ida ne’e, Horta dehan, tenke sai prioridade ida ba governu. Nia mós husu atu harii uma ho kualidade, nune’e doutor sira bele hala’o sira-nia servisu ho di’ak liu tan.

“Favór Ministra Saúde, Vise Ministru, Primeiru Ministru, haree oan sira médiku, enfermeiru, parteira sira iha suku sira ne'e," Horta apela.

Aleinde uma ba doutor sira, PR Horta mós preokupa kondisaun sentru mediku iha suku sira.

“Ha'u haree sentru médiku ita nian barbarak iha foho ne'e kuitadu, aat loos," katak nia.

Maske iha kritika balun ne’ebé mosu relasiona ho servisu profisional saude sira nian, maibé tuir PR Horta profisional saude balun ne’ebé halo servisu di’ak tebes.

Bazeia ba nia esperensia ne’ebé nia haree rasik iha ospital, Horta konta, bainhira kazu defisil balun no perigozu tebes, mediku Timor-oan sira mak halo intervensaun.

“Presiza liu mak ne'e, ekipamentu modernu. Maibé bainhira iha ekipamentu tenke rekruta kedas mós tékniku ba ekipamentu médiku,” dehan nia.

Iha fatin ketak, Diretór Ezekutivu Forum Organizasaun Naun Governamental (FONGTIL), Valentim da Costa Pinto hatete, laos ona tempu atu Ministra Saúde, Elia dos Reis Amaral, subar problema.

Di’ak liu, nia dehan, Ministra nakloke no buka solusaun atu oinsa bele rezolve problema hirak ne’ebé iha.

“Ministra Saúde tenke tuun direta ba iha munisípiu sira ne’e atu haree kondisaun ospital sira iha ne’ebá. Labele tuur de’it iha fatin, tuun ba nune'e haree ospital sira ne’e hodi haree problema sira, hotu mai buka solusaun oinsá mak atu rezolve, ida ne’e mak di’ak,” nia dehan.