Iha karta ofisiál ba Prezidente Repúblika Filipina, Ferdinand R. Marcos Jr, iha loron 9 fulan-Juñu 2026, Prezidente Ramos-Horta hato'o nia sentidu kondolénsia profunda ba lakon vida, kanek, no estragu materiál signifikativu ne'ebé kauza husi dezastre ne'e.

“Ha’u hakarak hato’o ba Sua Exelénsia, ba governu no povu Filipina sira, ha’u-nia kondolénsia profunda no sinsera solidariedade. Ha’u sei agradese tebes se Sua Exelénsia, bele hato’o ba família vítima sira ami-nia sentimentu triste no laran-susar ne'ebé kle'an liu. Ami mós hato’o ami-nia deseju ba rekuperasaun lalais ba sira hotu ne’ebé hetan kanek no espresa ami-nia solidariedade ba komunidade sira-ne’ebé afetadu husi trajédia ida ne’e,” Xefe Estadu espresa profunda tristeza no sinsera solidariedade ba governu no povu Filipina liu husi karta ofisial ne’ebé Online INDEPENDENTE asesu, Kuarta (10/06).

Timor-Leste akompaña ho preokupasaun esforsu autoridade Filipina no ekipa resposta emerjénsia nian hodi tulun populasaun sira ne’ebé afetadu no restaura normalidade ba área sira ne’ebé hetan impaktu.

Prezidente Ramos-Horta reafirma lasu amizade ne'ebé metin entre nasaun rua ne'e no espresa konfiansa katak, orientadu husi espíritu reziliénsia, korajen, no unidade ne'ebé karakteriza povu Filipina, Filipina sei ultrapasa dezafiu difisil ida-ne'e.