Deklarasaun husi PR Horta ne’e mosu hafoin polemika kona-ba informasaun ne’ebé Jornal INDEPENDENTE públika katak Palasiu PR bandu lori atributu Palestina iha eventu refere.

PR Horta hatete, tema ba maratona tinan ida ne’e, ‘Halai ba Palestina’, hili atu reflete Timor-Leste nia kompromisu istóriku no metin ba justisa, no pas ba povu Palestina. Ida ne’e aliña ho prinsípiu prinsipál sira ne’ebé mak TL harii.

“Ita-nia luta rasik ba independénsia harii iha fundasaun solidariedade internasionál nian. Iha espíritu hanesan ne’e mak agora ita hamriik hamutuk ho povu Palestina nian,” dehan PR Horta, liu husi komunikadu ne’ebé Jornalista INDEPENDENTE asesu, Kinta (09/10).

Haree korredór sira ne’ebé lori bandeira Palestina nian ka uza nia kór sira iha dalan sira Dili nian sei sai hanesan testamentu ida ne’ebé emosionante ba TL nia umanidade ne’ebé fahe no esperansa koletiva ba pas ida ne’ebé justu no duradoura.

“Maratona hanesan símbolu ida ba rezisténsia no espíritu umanu, no laiha dalan ida ne’ebé apropriadu liu mak atu kanaliza enerjia ida ne’e hodi bolu ba pas no solidariedade,” dehan Horta.

Relasiona ho ida ne’e, Superientendente Asistente Domingos Gomes hatete, PNTL nia pozisaun ne'e atu dehan de'it bainhira iha ona lisensa PNTL sei tuir.

"PNTL tuir de'it tanba nia (PR) boot liu ona, ita sei laiha komentáriu seluk tan. Ha'u hanoin klaru ona, PNTL nia pozisaun ne'e atu dehan de'it bainhira iha ona lisensa hanesan ne'e PNTL tuir,” dehan nia.

Iha fatin ketak, Vise Diretór Dahuluk Asosiasaun HAK, Antonino de Limas sente kontente bainhira PR Horta autoriza uza atributu Palestina nian.

"Mais mai ha'u presiza ba asuntu Palestina ne'e laos ita solidariza ba Palestina ne'e la signifika ita hirus malu ho Israel la'ós ida ne'e. Ne'e mós bainhira Timor-oan sira, estadu Timor-Leste apoiu Palestina nia ukun rasik an, ne'e la signifika ita la gosta Israel, la'ós ida ne'e," katak nia.

Entretantu, tuir planu, eventu maratona 2025 ho tema ‘Run for Palestine’ ka ‘Halai ba Palestina’ sei realiza iha 11 Outubru ne’e.