Tuir Dekretu Prezidente Repúblika No. 51/2026, Chefe da Casa Civil, Sra. Henriqueta Maria da Silva, hetan nomeasaun hodi reprezenta Prezidente Repúblika ba atribuisaun medalla sira.
Serimónia ne’e hala’o iha Era Ulu, Munisípiu Ermera, hodi rekoñese resipiente sira-nia papél fundamental iha konstrusaun no dezenvolvimentu ba Sentru Bakhita iha Era Ulu (Munisípiu Ermera) no Palaka Atsabe (Munisípiu Bobonaro).
Tuir Dekretu Prezidente Repúblika No. 52/2026, resipiente sira ne'ebé kondekora ho Medalla Méritu no Sertifikadu Rekoñesimentu 1. Matt Mealsy, Thirfty Rental Car Darwin; 2. Lena Filipe, Thirfty Rental Car Darwin; 3. East Timor Sunrise; 4. Ms. Eve, Water East Timor; 5. Endy Graham, Water East Timor; 6. Georgina Lougan-LETS; 7. Mike Berna; 8. Warrambool Rotary Club; 9. Josh Francis, Menzies School of Health Research; 10. Bram Milson.
11. Sue Milson; 12. Tenison, Woods Catholic Colleague; 13. Xavier Catholic Colleague; 14. Jack Sing; 15. Monica Leman; 16. José Adilson C. Ribeiro; 17. Ceva Air and Ocean Timor Unipessoal; 18. Fr. Helio Perreira Fernandes; 19. Eddie Carvalho; 20. David Bridie, Wantok Music.
Hafoin referendu iha tinan 1999, Santa Bakhita hahú serbisu iha Timor-Leste ho Dioseze Dili, hamutuk ho Pe. Juvito do Rego, Pe. Lucio de Deus, Pe. Domingos da Silva Soares, no joven na'in lima husi Australia no Timor-Leste.
Ekipa ne’e hahú uluk sira-nia serbisu iha Ainaro, depois muda ba Oecusse no parte sira seluk iha nasaun ne’e, sempre kolabora besik ho padre pároku lokál sira. Iha tinan 2003, Pe. Domingos, padre pároku Letefoho nian iha tempu ne’ebá, fó rai iha Era Ulu, fatin ne’ebé harii Sentru Bakhita. Husi sentru ne'ebá, misaun ne'e serbí ona komunidade sira iha Era Ulu no munisípiu Ermera. Agora selebra tinan 27 ezisténsia nian, Sentru Bakhita ajuda ona komunidade no eskola barak tebes. Doadór barak ne'ebé maka apoia ona Saint Bakhita dezde 1999 kontinua envolve ativamente.
“Timor-Leste ultrapasa ona dezafiu barak no hetan susesu dezenvolvimentu importante sira , agradese konta ho esforsu husi ita-nia belun sira, tantu iha rai-laran no iha rai-li’ur. Individual no organizasaun sira ne’ebé ohin loron rekoñese serbisu maka’as hodi harii Sentru Bakhita, hodi transforma Timor-oan barak nia moris. Sira-nia servisu hatudu espíritu solidariedade ne’ebé harii ita-nia nasaun,” deklara Prezidente J. Ramos-Horta.
Prezidente Ramos-Horta nu'udar apoiante kleur ona ba Sentru Bakhita, no ninia enkorajamentu kontinua hetan apresiasaun profundamente husi sentru no komunidade sira.