Agostinho Pinto ne’ebé durante ne’e nu’udar portavós ba Eis profesór Kontratadu 2023, konkorda tuir teste espesiál Bolsa Kandidatu ba Profesór sira.
Portavóz ne’e rasik submete ninia dokumentu sira iha fulan-Marsu liu ba iha Salaun Ensinu Rekorrente Tuana laran, Díli, ba Rekursu Umanu Ministériu Edukasaun nian no prienxe rekezitu sira atu tuir teste.
Nune'e, iha segunda loron 16 fulan-ne'e, Portavos ne'e halo protesta no husu ba Ministeriu Edukasaun ho Komisaun Funsaun Publika atu suspende teste espesial ba eis profesor kontratadu sira.
“Maibe iha teste ba loron ikus nian iha 17 juñu 2025, portavós Agostinho Pinto hakat mai partisipa teste no hetan valór 68. Nu’udar profesór eis kontratadu 2023, nia sei hetan tan valór pontu 10 nu’udar bonus husi Ministériu Edukasaun no CFP, ho nune’e maka totál valór Portavóz ne’e ninian sa’e ba 78 iha agrupamentu Biolojia no Jeolojia,”Online ne’e sita iha komunikadu tersa ne’e (17/06/25).
Nune’e, tuir dadus, totál Eis Profesór Kontratadu 2023 nian ne’ebé aplika ka rejista atu tuir teste hamutuk na’in 725.
Husi númeru ne’e, na'in 701 maka partisipa iha teste espesiál no kuaze na’in 310 maka pasa iha teste.
“Husi prosesu teste to’o ninia rezultadu fó sai hatudu katak entidade sira balun ne’ebé durante mai ho hanoin negativu ka duun katak iha politizasaun ba prosesu teste Bolsa Kandidatu Profesór ne’e laloos,”tenik komunikadu refere.
Tanba bazeia ba regras husi Ministeriu Edukasaun maka, atu sai professor tenke liu husi teste.
Ho nune’e, Ministeriu Edukasaun parabeniza partisipante sira ne’ebé partisipa iha teste bolsa kandidatu profesór sira ba nível Sekundáriu Jeral no TECVOC ne’ebé pasa ona iha teste ne’e. tanba ne’e, husu atu manán na’in sira atu akompaña nafatin avizu husi DNRH Ministériu Edukasaun kona-ba prosesu sira tuir mai.
“Ba partisipante teste bolsa kandidatu sira ne’ebé seidauk pasa iha teste ne’e, Ministériu Edukasaun husu atu Ita-Boot sira keta laran taridu tanba bainhira iha vagatura iha eskola sira maka Ministériu Edukasaun hamutuk no CFP sei kontinua loke teste ba Bolsa Kandidatu Profesór sira”.