Komandante Jerál PNTL daruak, Komisaria Natercia Martins hatete, Komandu deside medida ne’e atu garante prosesu ne’ebé transparente no tuir lei.

"Komadante Jerál fó ona kbiit ka poder ba iha ita ninia Inspetór Jerál ne'ebé iha liu kompeténsia atu bele verifika halo inspesaun, halo audit," dehan Komisaria Natercia, ba jornalista sira hafoin hala'o enkontru ho PR Horta, iha Palásiu Prezidensiál Bairu-Pite, Sesta (17/04).

Komisaria Natercia esplika, kazu ne’ebé envolve pesoal polísia normaliza tama iha kategoria rua: infrasaun disiplinár ka krime. Maibé, atu foti desizaun, tenke iha evidénsia no prova klaru.

“Se karik komete infrasaun disiplinár, tenke iha aktu ne'e rasik, no tenke iha ema ne'ebé sai vitíma, no tenke iha ninia evidensia nune'e sai prova,” dehan Natercia.

Nia subliña katak pesoal polísia tenke hatene prosedimentu institusionál, liu-liu kona-ba oinsá atu hato’o rekursu ka reklama ba superiór sira, laos de’it liu husi públiku.

Iha fatin ketak, konsidera katak kazu ne’e kompleksu no presiza investigasaun kle’an atu hatene ninia hun.

"Ita hein Inspetór Jerál bele investiga nune'e bele hatene didi'ak problema Superintendente Julia Gama ne'e, no investigasaun mak bele fó sai informasaun loloos," katak nia.

Molok ne’e, Ministru Interiór, Francisco da Costa Guterres deklara, fó ona instrusaun ba lideransa foun PNTL atu rezolve kazu ne’e liu husi komunikasaun no diálogu internu.

Nia enfatiza katak xave ba rezolusaun mak komunikasaun intensivu entre lideransa no membru sira.

"Presiza mós reuniaun beibeik, presiza mós ko'alia ba malu beibeik par atu dehan katak ‘lae (nu’udar) Ofisiál Superiór,ita mak tenke asegura instituisaun ida ne'e,” dehan Ministru, Sesta (27/03).