Xefe Departamentu Prevensaun Konflitu Komunitaria husi Komando Jerál PNTL, Superintendente Polisia Joni Viana husu ne’e, bainhira ho nia ekipa aproxima hela ho manifestante husi Estudante Universitáriu Timor-Leste  ne’ebé segunda ne’e (15/09/25) hala’o manifestasaun hodi hato’o ezizensia sira ba Parlamentu Nasional relasionado sosa kareta foun ba deputadu sira.

“Ami mai iha ne’e atu halo aproximasaun ba ita nia estudante universitariu sira atu halo manifestasaun tuir lei no hato’o aspirasaun no labele iha konflitu. Manifestasaun ne’e atu hato’o aspirasaun no hanoin sira, nune’e ita tenke tuir regras manifestasaun nian, hodi kria estabilidade,”dehan nia ba Jornalista sira iha resintu UNTL Sentral, Dili, Segunda (15/09/25).

Tanba ne’e, tuir Superintendente Polisia Joni Viana hatutan, manifestante ne’e direitu sidadaun sira nian, maibé tenke tuir regras ne’ebé estabelese ona hodi evita konflitu sira.

Entretantu, ezizensia sira ne’ebé Estudante Universitáriu Timor-Leste sira ezizi ba Parlamentu Nasional mak, kansela no hapara kultura sosa kareta luxu ba deputadus sira, halakon lei pensaun mensál vitalísia, alterasaun ba lei liberdade reuniaun no manifestasaun no mós ezize ba PN atu kada tinan aloka OJE ho pursentu ne’ebé boot ba setór produtivu no infraestrutura sira iha baze.

Enkuantu, manifestasaun ne’e hahú iha tuku 08:00 oras Timor-Leste, no manifestante sira mai husi estudante sira husi UNTL, UNDIL, UNITAL, IOB, UNPAZ, inklui mós ema ho defisiénsia sira, manorin, sosiedade sivil no mós negosiante sira.