“Ita mós ohin hamutuk iha ne'e ko'alia kona-ba preparasaun ita-nia ba iha eventu CPLP nian ne'ebé sei realiza iha ita-nia rai hahú hosi 14 to'o 29 ni’an, entaun tenki prepara forsa di'ak liu tan, atu nune'e bele asegura seguransa iha eventu ne'e,” dehan, Komandante Jerál PNTL, Komisariu Jerál Polísia Henrique da Costa ba Jornalista sira, hafoin remata avaliasaun servisu, iha CFP, Comoro, Kinta (10/07).
Komisariu Jerál PNTL ne'e konsidera katak, eventu CPLP ne'e la’os eventu desportiva de'it, maibé iha mos iha eventu sira seluk hanesan kultura ninian nomos iha enkontru ruma tan karik.
“Entaun ida ne'e ita persiza asegura seguransa ba eventu ida ne'e ho di'ak, nune'e bele fo atendimentu ka bele asegura labele mosu krime ruma nomos tenki organiza mos karreta no motor hodi labele mosu engrafamentu,” Nia informa.
Nia dehan, iha Jogu CPLP iha atividade barak mak sei halo durante semana ida ka rua hahu hosi 14 to'o 29 Jullu, entaun Komandu Munisípiu Dili mak tenki orienta no koloka membru sira balun ba iha Aeroportu Prezidente Nicolau Lobato.
Nune’e mós, tenki asegura alta entidade sira hosi rai-liur nomos asegura ba jogador sira no sira seluk tan, nune'e eventu boot ne'e bele la'o ho susesu, nune'e labele halo ema kestiona serbisu polísia ni’an.
“Hakarak atu hatete katak, ba sira ne'ebé servisu iha Aeroportu liu-liu Komandante Munisipiu Dili, Komandante tranzito ninian hatudu ida-idak nia perfiormansia di'ak,” Nia konklui.
Entretantu, iha loron Kuarta 09 Jullu 2025, Segundu Komandante Jerál PNTL, Komisariu Polisia Pedro Belo hala’o enkontru ho Koodenador Jeral jogu Desportu CPLP atual Sekretariu Estadu Arte no Kultura Jorge Soares Cristovão hamutuk ekipa sira halo diskusaun ba preparasaun seguransa ba eventu internasionál jogu desportu CPLP.
Iha enkontru ne’e, koalia kona-ba preparasaun seguransa asegura bainaka alta entidade nasional no internasional ho partisipante sira husi nasaun membru CPLP ne’ebé sei partisipa iha eventu ne’ebé sei realiza iha loron 17 to’o 27 Jullu 2025, iha Timor-Leste.
Entretantu, iha sorumutu ne'e partisipa husi Komandante Komandu Operasaun PNTL Superintendente Xefe Justinho Menezes reprenzenta UEP, PNTL Munisipiu Dili ho ekipa komisaun organizadora ba jogu Desportu CPLP epoka 2025.