Iha sesaun plenária ne'e prezide hosi Prezidente Parlamentu Nasionál, Maria Fernanda Lay akompaña hosi membru meza sira, deputadu sira ho prezensa Primeiru-Ministru (PM), Kay Rala Xanana Gusmão no membru Governu sira.
Primeiru-Ministru, Xanana Gusmão agradese bá deputadu sira ne’ebé durante loron hirak nia laran hala’o diskuasaun bá Orsamentu Retifikativu ne’e iha ambiente demokrátiku, hamosu krítika oioin hodi hadi’a erru sira ne’ebé iha.
“Ita diskute malu iha Parlamentu, maibé ida ne’e mak demokrásia fó hanoin ba malu. Ami mos mai aprende buat barak hodi deputadu sira fó lembra katak atu halo buat ruma tenke haree didiak. Ne’ebé, ajuda malu duni, bolu mós atensaun ba ami kona-ba buat barak ne’ebé sei falta. Loos duni, ami la dehan katak ami halo buat hot-hotu maibe ami sei presiza haka’as an nafatin atu halo diak liu, oituan tan saida ami bele, hodi fó valor duni ba ukun an ne’e,” Dehan Xefe Governu, iha plenária Parlamentu Nasionál, Tersa (02/06).
Iha oakziaun ne’e mós bankada sira hato’o deklarasaun votu hodi afirma pozisaun iha atribuisaun votu bá Orsamentu Retifikativu ne’e.
Hafoin aprovasaun iha finál globál, Komisaun Finansas Públikas ka Komisaun C sei elabora testu finál antes Parlamentu Nasionál haruka bá Prezidente Repúblika hodi promulga.
Orsamentu Retifikativu ho montante millaun $192 ne’e hodi assegura situasaun iha rai laran relasiona ho impaktu hosi funu Médiu Oriente. Nune’e, Governu prevé medida hitu ne’ebé sai prioridade hodi garantia seguransa enerjétika no segurança alimentár iha país.
Medidas hirak ne’e mak hanesan: Sosa kombustível bá rezerva nasionál, Subsídiu kombustível, Seguransa alimentár, Segurança nasionál bá rekrutamentu 400 kadetes PNTL, Despeza prezidénsia CPLP, Reforsu kapasidade administrativa no operasionál Rejiaun Administrativa Espesiál Oecusse Ambeno (RAEOA) no Reforsu rezerva kontijénsia.
Purtantu, Proposta Orsamentu Retifikativu ne’ebé aprovadu, Komisaun C trata asuntu finansas publikas sei halo redasaun finál foin Parlamentu Nasionál haruka ba Prezidente Repúblika hodi halo promulgasaun.