Iha aprovasaun proposta lei númeru 18/VI (2a) kona-ba Kódiku prioridade industriál ne’e, paritisipa husi Ministru Komérsiu no Industria, Nino Pereira.

Lejislasaun ne’e, kompostu hosi artigu 203, atu moderniza enkuadramentu jurídiku nasionál, proteje patente sira, marka sira no inovasaun, aliña Timor-Leste ho padraun internasionál sira hosi OMK no ASEAN nian. Inisiativa ne’e, konsidera hanesan estratéjiku ba diversifikasaun ekonómika no valorizasaun koñesimentu tradisionál, maski organizasaun sira sosiedade sivil nian alerta kona-ba nesesidade transparénsia boot liu no partisipasaun populár iha prosesu lejislativu.

Importánsia Propriedade Intelektuál (PI) iha Komérsiu, Haburas Inovasaun ba propriedade intelektuál, liuliu propriedade industriál, enkoraja inovasaun hodi asegura katak kriadór no inventor sira bele hetan benefísiu ekonómiku hosi sira nia serbisu/obra no proposta Lei ida ne´e sai pasu signifikativu ida ba Timor-Leste nia enkuadramentu legál no institusionál ba Propriedade Intelektuál.

Antes ne’e Ministériu Komérsiu no Indústria(MCI), hamutuk ho ajensias estadu sira hanesan AIFAESA, SERVE, IQTL no Autoridade Aduaneira, hala’o audiénsia ho Komisaun D Parlamentu Nasional, ne’ebe MCI aprezenta ho intensaun katak, lei ne’e atu fó konfiansa ba operador ekonómiku sira, ho objetivu atu kria ambiente ida-ne’ebé kompetitivu no transparente no promove dezenvolvimentu ekonómiku ne’ebé sustentável, hadi’a nafatin kondisaun moris populasaun nian, no konsumidór sira-nia moris di’ak.

Iha sesaun plenária ne’e prezide hosi Prezidente Parlamentu Nasionál, no prejensa hosi Ministru Komérsiu no Indústria, akompaña husi asesór no ekipa tékniku sira, no mós Vise-Ministru Asuntus Parlamentares, Adérito Hugo da Costa.