Desizaun atu halo dialogu ne’e mosu hafoin problema ne’ebé akontese entre komunidade sira iha Naktuka, Suku Bene-Ufe, Sub Rejiaun Nitibe, Rejiaun Administrativu Espesial Oekusse-Ambeno (RAEOA), ho komunidade Desa Amfoang, Kecamatan Amfoang Utara, Kabupaten Kupang, Nusa Tenggara Timur.

Durante ne’e, autoridade husi RAEOA no Amfoang Utara halo koordenasaun ne’ebé di’ak tebes hodi konsege hetan konkordansia ba dialogu ne’ebé tuir planu sei realiza iha 10 Dezembru 2025.

Dutante PM Xanana nia vizita iha Naktuka, Autoridade sira husi Nitibe atualiza kona-bá desizaun ne’e, no PM fó apresiasaun másima, husu atu ko’alia didi’ak nu’udár maun-alin.

“Ha’u sei haruka karta ba Prezidente Prabowo hodi dehan katak iha 10 Dezembru hahú dialogu entre komunidade. Ha’u husu TNI labele tama kahur, nune’e dialogu ne’e iha rezultadu ne’ebé di’ak,” dehan PM Xanana iha Naktuka, Domingu (30/11), hanesan jornalista INDEPENDENTE sita husi pajina ofisial PM Xanana.

PM Xanana observa katak, komunidade Naktuka no maluk sira iha sorin ne’ebé baibain bolu malu maun-alin, bainhira konsege duni halo diálogu, ida ne’e di’ak tebtebes, nune’e ema ruma ba provoka atu halo fali buat ruma mós sira hatene ona katak komunidade rua ko’alia ba malu ona, ko’alia tuir lisan no kultura tanba ne’e lakohi halo tán problema.

Xefe Governu kontente no husu bo’ot bá rai-lulik, matebian sira hotu atu akompaña nune’e iha 10 Dezembru 2025 buat hotu la’o di’ak.

Xanana Gusmão fó atensaun bá komunidade iha Naktuka atu bainhira maun-alin sira husi parte Amfoang mai tenke simu ho di’ak nu’udár maun ho alin.

“Ko’alia bá malu, labele hirus malu, haku’ak-malu hodi rezolve lalais kestaun fronteira ne’e,” Xefe Governu ne’e husu.

Iha fatin hanesan, Jestór Sub Rejiaun Nitibe, Agustinho Afulit informa, planu diálogu loloos realiza iha 2024 maibé la konsege no agradese tanba foin daudaun kolabora di’ak ho Prezidente Autoridade nune’e iha ona konkordánsia atu bele realiza iha loron 10 Dezembru ne’e.