Tuir komunika ne’ebé online INDEPENDENTE asesu katak Primeiru-Ministru mós aproveita ko’alia ho dirijente hosi Autoridade Portuáriu Timor-Leste (APORTIL) no instituisaun sira seluk mak okupa área Portu Dili kona-bá planu hamamuk fatin ne’e no muda eskritóriu bá fatin foun.

Xefe Governu mós observa antigu edifísiu Alfándega iha Colmera ne’ebé presiza rehabilita, nune’e instituisaun Estadu sira bele utiliza.

Alende ne’e, PM Xanana haree mós progresu rehabilitasaun edifísiu Casa Europa ne’ebé tuir kontratu tenke finaliza iha fulan-Juñu tinan ne’e.

Akompaña Primeiru-Ministru maka Ministru Planeamentu no Investimentu Estratéjiku (MPIE), Gastão Francisco de Sousa, Prezidente Konsellu APORTIL, José de Oliveira Leong, Diretór Ezekutivu Ajénsia Dezenvolvimentu Nasionál (ADN), Januário Guterres.