Tuir komunika ne’ebé online INDEPENDENTE asesu katak galeria arte ne’e inklui instalasaun Arku Akríliku naroman no mós kolesaun imajen sira kona-bá paizajen tasi Timor-Leste nian, ne’ebé ezibidu iha área hosi tasi ibun Palásiu Governu to’o iha Casa Europa.

Iha Imajen sira ne’e foka liu bá biodiversidade úniku Tasi Timor nian, ne’ebé hatudu relasaun forte entre ekosistema tasi ho vida no kultura povu Timor-Leste nian.

Espozisaun ne’e iha objetivu atu sensibiliza no hasa’e koñesimentu públiku kona-bá importánsia Oseanu, liu-liu nia papél krusiál bá sustentabilidade vida umana no ambiente.

Programa ne’e mós konsidera hanesan inisiativa ida hodi atrai vizitante nasionál no internasionál, atu aumenta koñesimentu kona-bá protesaun tasi no konservasaun ambiente bá futuru jerasaun.

Atividade ne’e organiza hosi Ministériu Turismu no Ambiente (MTA) hamutuk ho Gabinete Fronteira Terrestre no Marítima (GFTM), nu’udár parte hosi esforsu governu nian atu promove “ekonomia azúl” no konsiénsia ambientál.

Iha serimónia ne’e partisipa mós hosi membru IX Governu Konstitusionál, Koordenadora Unidade Ekonomia Azúl, Inês Araújo-Gonçalves, reprezentante Gabinete Fronteira Terrestre no Marítima, funsionáriu sira no konvidadu sira seluk.

Programa Semana Oseanu 2026 kontinua hanesan espasu ida atu reforsa kompromisu nasionál bá protesaun no valorizasaun rekursu mariñu Timor-Leste nian.