Enkontru ne’e parte hosi vizita ofisiál loron rua nian (4–5 Juñu 2026) iha Timor-Leste (TL), ne’ebé ho objetivu atu reafirma parseria metin entre Estadus Unidus Amérika ho Timor-Leste, liu-liu iha área prioridade rejionál no globál.

Durante vizita ne’e, Sekretáriu Estadu Adjuntu DeSombre hasoru mós Prezidente Repúblika (PR), José Ramos-Horta, hodi diskute programa kooperasaun bilaterál, estabilidade rejionál no involvimentu Timor-Leste nian iha forum rejionál no internasionál sira.

“Enkontru sira ne’e mosu iha momentu importante ida, koinside ho komemorasaun independénsia EUA nian bá dala-250, ne’ebé reforsa valór komún sira hanesan liberdade, demokrasia, soberania no autodeterminasaun, ne’ebé sai hanesan baze forte bá relasaun EUA–Timor-Leste,” sita komunikadu ne’ebé online INDEPENDENTE asesu, Kinta (04/06).

Estadus Unidus Amérika reafirma nia kompromisu atu kontinua servisu hamutuk ho Timor-Leste hodi hametin ligasaun bilaterál, apoia estabilidade rejionál, no kontribui ba páz, seguransa no prosperidade iha rejiaun Indo-Pasífiku.

Michael G. DeSombre simu pose nu’udár Sekretáriu Estadu Adjuntu bá Asuntus Ázia Leste no Pasífiku iha 10 Outubru 2025.

Molok ida-ne’e, nia servisu hanesan sósiu iha firma internasionál advokasia Sullivan & Cromwell, iha área fuzoens no akizisaun no mós lidera prátika iha Ázia.

Entre 2020 to’o 2021, nia serbi hanesan Embaixadór EUA bá Tailándia. DeSombre mós iha esperiénsia naruk iha Ázia durante tinan 25-resin, no iha formasaun akadémika iha Universidade Stanford no Harvard Law School. Nia domina lian Mandarin no bele mós ko’alia Koreanu no Japonés.

Enkontru ne’e konsidera hanesan pasu importante ida hodi kontinua fortalese relasaun diplomátika entre Timor-Leste ho Estadus Unidus Amérika iha futuru.