Pedidu autorizasaun despeza ne’e aprezenta husi Ministru Petróleo Rekursu no Minerais (MPRM).

“Ohin Konsellu Ministru aprova pedidu autorizasaun husi Ministerio Petroliu Rekursu Minerais, tanba tuir lei, kualker despeza liu millaun lima, presiza hetan aprovasaun,”dehan Ministru Petróleo Rekursu no Minerais Francisco da Costa Monteiro ba Jornalista sira, hafoin remata reuniaun Konsellu Ministru, iha Palasiu Governu, Dili, Kuarta ne’e (02/07/25).

Nia dehan, ba konstrusaun auto-estrada ne’e, agora dadauk tenderizasaun lao hela no sei submete proposta sira ne’e iha fulan-jullu nia laran.

“Agora dadauk tender konstrusaun auto estrada nian no konstrusaun suplay  nian la'o hela, atu submete proposta sira ne'e iha fulan jullo nia laran, nune’e iha fulan Agostu halo evalusaun, no fulan Setembru nian laran, bele iha ona kontraktor foun ba konstrusaun sira ne'e. Nune'e presiza halo aprovizionamentu ba kompañia supervizaun sira atu nune’e bele ajuda ministeriu,”tenik nia

Entretantu, despeza sira ba konstrusaun auto-estrada husi Zumalai ba Betanu (STA. 34+155 – STA. 59+767) ho dolar amerikanu milaun $12,97, husi Betanu ba Uma Berloic (STA. 59+767 – STA. 85+259) ho montante milaun $12,97 no mós husi Uma Berloic ba Natarbora (STA. 85+259 – STA. 110+787) ho valor milaun $12,97.

Enkuantu, inisiativa ida ne’e envolve iha implementasaun projetu Tasi Mane, iha kosta súl nasaun nian, konsidera hanesan estruturál ba dezenvolvimentu setór petróleu nasionál.

Projetu ne'e ninia objetivu mak atu hamosu benefísiu ekonómiku diretu ba populasaun, liuliu, liu husi dinámika indústria mina-rai nian no kriasaun empregu asosiadu sira.

Nune’e, projetu Tasi Mane sei kontribui nafatin ba aumentu iha Produtu Brutu Internu no tanba ne'e ba dezenvolvimentu ekonómiku Timor-Leste nian.