Diretór Diresaun Servisu Investigasaun Kriminál (DSIK) Superintendente Polísia João Belo dos Reis informa, relasiona ho informasaun ne'ebé virál iha rede sosiál, Padre Padre Joaquim Sarmento dezeñu logo Jejuita tau ba bandeira RDTL, tanba ne'e parte PNTL bolu ona sidadun ne'e mai presta deklarasaun kona-ba aktu ne'ebé nia halo.

“Ita ohin bolu ona Padre Joaquim Sarmento mai presta deklarasaun kona-ba logo ne'ebé nia rasik tau iha emblema Bandeira RDTL ne'e, atu fó razaun no motivu saida mak nia halo ida ne'e, tanba iha deklarasaun sira ne'e, prense elementu krime balun, entaun parte PNTL husi Diresaun Servisu Investigasaun Kriminál (DSIK) rejista ona, ohin ita aprezenta ba Ministeriu Públiku atu kontinua halo prosesu tuir lei ne'ebé vigóra iha Timor-Leste,” Informa Porta Vóz PNTL João Belo dos Reis liu husi komunikado ne'ebé Online INDEPENDENTE asesu liu Pajina Facebook PNTL, Sesta ne’e (13/06).

Porta Vós PNTL ne’e hatutan, emblema no simbolu Bandeira RDTL iha kór haat (4) ne'ebé ho nia postura regula no hakerek ona iha Konstituisaun RDTL, tanba ne'e atu halo mudansa ba kor Bandeira ne'e, presiza halo mudansa iha Konstitusaun RDTL la’ós sidadaun sira dezeñu fali simbolu oin-oin hodi taka ba bandeira, ne’e krime.

“Ohin ita bolu sidadaun ne'e mai atu klarifika, tanba saida mak buat ne'e akontese, tanba postura kór ne'ebé iha ne'ebá reprezenta ona emblema bandeira RDTL, entaun sidadaun ida labele inventa buat ne'ebé fora husi Konstitusaun RDTL hakerek ona, entaun ita bolu Padre Joaquim Sarmento ne'e mai presta deklarasaun rejistu hotu aprezenta ba Ministeriu Públiku, tanba ne'e ita la tolera sidadaun sé de'it mak halo asaun ne'ebé viola simbolu nasionál,” katak Porta Vos PNTL.

Iha fatin hanesan Autor Padre Joaquim Sarmenrto, rekoñese aktu ne’ebé nia halo, tanba ho inisiativa rasik mak dezeñu logo Jeijuita iha Bandeira RDTL, hafoin hetan kritika barak iha media sosial, tanba   ne’e autoridade seguransa bolu mai presta deklarasaun iha Polísia Nasionál Timor-Leste (PNTL) iha Diresaun Servisu Investigasaun Kriminál (DSIK) nia fatin hodi halo klarifikasaun.

“Ha'u rekoñese halo tiha ona sala ida no ha'u husu deskupa ba povu Timor-Leste, Erói no martires no ba ema sé de'it mak sente ofendidu ho hahalok ne’ebé ha'u halo, ne’e sala, ha’u husu deskupa no ha'u laiha intensaun des onra no falta respeita ba Bandeira RDTL, maibé ida ne'e sala ida ne'ebé ha'u halo ona, ha'u rekuñese husu deskulpa ba povu Timor-Leste,” dehan Padre Joaquim Sarmento.

Nia dehan Presta deklarasaun iha PNTL, tanba iha media sosial virál ho imajem Bandeira RDTL, halo imprime ho logo Jejeuita iha Timor-Leste hodi fó lembransa ba kolega Padre Misionariu Portugés ida naran Abel Bandeira, ne'ebé fila hikas ona ba nasaun Portugál iha loron 12 fulan Juñu 2025.

“Ita hotu akompaña iha media sosial ema barak halo komentáriu kritika fó hatene kona-ba sala ne'ebé ha'u halo ona, tanba ha'u rasik mak iha ideia inisiativa haruka ema halo imprime Bandeira RDTL ho Jejeuita iha Timor-Leste nian atu fó lembransa ba ha'u nia kolega Padre Misionariu Portugés ida naran Abel Bandeira ne'ebé fila ona ba nasaun Portugál,” hatutan  Padre Joaquim Sarmento.

Nia mós rekuñese, ideia no hahalok ida haruka ema imprime Bandeira RDTL ho logo Jejeuita nian ne'ebé simboliza Timor-Leste, ne'e krusifikadu hotu, entaun hanoin ideia rasik tau logo ne'e ba Bandeira RDTL, maibé viral iha media sosial hamosu kritika katak, hahalok ne'ebé halo ne'e sala.

“Ha'u deklara katak, sala ne'ebé ha'u halo ne'e, ha'u pesoal mak halo, ha'u la reprezenta Igreja Katólika no komunidade Jejeuita iha Timor-Leste, ha'u rekoñese ida ne'e, ha'u rasik mak halo sala ona, ha'u prontu atu responsabiliza ida ne'e tuir lei ne'ebé vigóra iha Timor-Leste,” Padre ne’e hakotu.