Oscar dehan, komunidade sira ne’ebé hela besik iha área refere hato’o sira-nia preokupasaun kona-ba kondisaun estrada ne’e.

Tuir relatoriu husi komunidade, alargamentu estrada ne’e iha implementasaun la konsistente, tanba iha fatin balun estrada la’os sai luan maibé naruk fali ho kondisaun klot liu.

“Ha’u simu mensajen husi maluk populasaun sira ne’ebé hela besik iha ne’ebá, katak agora estrada ne’e klot liu tiha fali,” dehan deputadu ne’e, iha plenária Parlamentu Nasionál, Tersa (09/06),

Oscar subliña katak infraestrutura estrada tenke garante asesu ne’ebé seguru no fasil ba komunidade sira, maibé rezultadu atual bele kria difikuldade ba transportasaun, inklui aumenta risku engravamentu iha Dili.

Nia refere, iha prátika konstrusaun balun, hanesan trotoar no jardin iha área estrada, bele afeta espasu estrada ne’ebé disponivel, hodi reduz kapasidade dalan.

“Estrada importante tenke luan atu ema bele asesu ho fasil, la’os alarga de’it maibé depois sai problema fali,” nia dehan.

Maski nune’e, nia rekoñese katak nia la’os tekniku, tanba ne’e husu Ministériu Obras Públikas atu halo avaliasaun foun ba projetu ne’e hodi identifika problema sira iha terrenu no buka solusaun apropriadu.

“Ha’u la’os tekniku, maibé Ministeriu tenke haree didi’ak projetu sira ne’e,” nia afirma.

Liu tan, Oscar sujere katak Governu presiza konsidera solusaun tempu naruk hodi enfrenta engravamentu iha Dili, inklui possibilidade konstrusaun estrada andar iha área sira ne’ebé movimentu tráfiku aas.

Tuir nia, aumenta veíkulu iha kapital Dili presiza solusaun infraestrutura ne’ebé modernu, atu evita problema tráfiku ne’ebé sei grave liu iha futuru.