Okupante Domingos Guterres Belo hatete, nia parte koopera ho Governu hodi sai husi fatin refere, tanba rai ne’e nu’udar rai Estadu.

Nune’e, nia dehan, antes ne’e sira hetan ona notifikasaun katak iha loron 9 fulan-Jullu ne’e sira sei hamamuk fatin ne’e hodi entrega fali ba eskola.

"Governu ninia planu haruka ami sai husi fatin ne’e, ami prontu no ami kontente, tanba durante ha’u okupa ona rai estadu ne’e iha tinan 2006, ne’ebé bainhira ha’u sai, ha’u kontente,”dehan nia ba Jornalista sira iha áreador Eskola 10 Dezembro, Komoro, Dili, Kuarta (09/07/25).

Iha fatin hanesan, Xefe Suku Fatuhada, Marcelino Soares hatete, programa atu hasai komunidade sira husi áreadores eskola 10 Dezembro nian iha kedan tinan 2011, banihira nia hahú eleitu nuudar Xefe Suku.

"Programa hasai sira husi fatin ne'e la'os foin maka halo programa ne'e,maibe ne'e hahu husi 2011, depois de ha'u eleitu sai Xefe Suku, ha'u simu orden husi Munisipiu Dili no mos husi Edukasaun Munisipiu Dili nian atu rejistu professor sira ne'ebé  maka hela iha resintu Eskola nian, entaun ha'u rezistu duni iha tinan 2011,”dehan Xefe Suku ne’e.

Nune’e, Xefe Suku ne’e haktuir, komunidade presiza sai husi fatin ne'e, atu nune’e laiha impedimentu ba prosesu aprendizajen ba estudante sira.

Lider Suku ne’e akresenta, okupante iha eskola 10 Dezembro, maioria maka professor sira, tanba ne’e tuir programa IX governu nian, komunidade ne’ebé okupa areador eskola, tantu professor no la’ós professor, hotu-hotu tenke hamamuk fatin refere.

Ho nune’e, Governu sei fasilita transporta okupante sira ne’ebé maka fila ba munisipiu. Tanba nia dehan, iha okupante uma-kain 22 ne’e iha uma-kain 4 maka fila ba munisipiu, liliu iha munisipiu Baukau Postu Administrativu Kelikai.