Iha sesaun plenária Parlamentu Nasionál, Segunda (16/03), Deputada Virgina hato’o ninia intervensaun ho sentimentu triste no hamonu matan-been, tanba ninia beioan ho idade tinan 8 lakon nia vida iha HNGV.

Nia dehan, maski labele dehan katak sistema saúde kolapsu, maibé problema iha atendimentu saúde real duni no kleur ona seidauk hetan solusaun.

“Ha’u lakohi dehan saúde kolapsu tanba atendimentu ba pasiente sira lao normal hela. Maibé se dehan iha problema, entaun problema duni.Problema ne’e la’os foin akontese maibé mai kedas husi governasaun sira anteriores no to’o agora seidauk bele rezolve, liu-liu kona-ba labarik sira ne’ebé loron-loron mate hela,” dehan nia.

Deputada ne’e esplika, ninia beioan sente moras iha ulun, maibé hafoin moras ne’e daet ba pulmaun no parte isin seluk. Ikus-ikus, labarik ne’e mate iha sala kuidadu intensivu iha HNGV.

Nia mós informa katak iha sala kuidadu intensivu ne’e rasik labarik na’in limamak halo tratamentu no labarik haat mate tutuir malu.

“Ha’u bele imajina família sira ne’ebé laiha kbiit saida mak sira bele halo. Se ida ne’e akontese ba ha’u rasik, entaun oinsa ho família sira seluk?,” nia lamenta.

Deputada Virgina levanta mós dúvida kona-ba fator balun ne’ebé bele kontribui ba labarik sira nia mate iha ospitál, hanesan espasu limitadu iha sala baixa, kontrolu vizitante ne’ebé la sufisiente, ekipamentu saúde ne’ebé tuanona, no medikamentu ne’ebé dala-ruma la sufisiente.

Nia akresenta, kazu hanesan ne’e la’os foin akontese iha ninia família. Iha tinan 2024, nia mós lakon subriñu ida ho idade tinan 19 tanba la konsege hetan tratamentu iha tempu loos.

Deputada Virgina husu Governu atu aselera konstrusaun sala pediatria iha ospitál foun ‘andar lima’ atu bele mellora atendimentu ba labarik sira.

“Se lae, ita-nia oan sira loron-loron sei mate idaida. Ha’u haree ho matan rasik oinsa ha’u-nia beioan mate tanba atendimentu la di’ak,” nia dehan.

Iha debate ne’e, deputadu balun mos levanta preokupasaun kona-ba kondisaun sistema saúde iha rai laran.

Deputadu bankada Frente Revolucionária de Timor-Leste Independente (Fretilin), Antoninho Doutel Sarmento hatete, sentru saúde iha munisípiu balun iha kondisaun aat ne’ebé bele prejudika atendimentu ba pasiente.

Hanesa mós Deputadu CNRT, Mateus da Cruz, ne’ebé sekunda preokupasaun Deputada Virgina no husu Governu atu tau atensaun boot ba kazu labarik mate iha HNGV.

Entretantu, Vise Ministru Asuntu Parlamentar, Aderito Hugo da Costa dehan, Governu sei rejista preokupasaun sira ne’e no sei envia ba Ministériu Saúde atu tau atensaun seriu ba sistema atendimentu saúde iha ospitál no sentru saúde sira iha rai laran.

“Intervensaun Deputada nian importante loos. Ami sei haruka informasaun ba Ministériu Saúde atu haree didi’ak situasaun atendimentu saúde iha teritoriu tomak,” nia dehan.