Primeiru Ministru (PM) Interinu, ne’ebé hala’o knaar mós nu’udar Vise Primeiru Ministru no Ministru Koordenadór ba Asuntu Sosiál, Mariano Assanami Sabino hatete, governu no parte interesadu sira hetan ona entendimentu inisiál kona-ba saláriu mínimu foun.
“Enkontru ne’e, parte Sidikatu traballador sira mak la mai, maibé CCI-TL no SEFOPE iha ne’e, sira iha ona konkordansia, nune’e iha tempu badak Konsellu Ministru tuir mai sei halo aprovasaun ba esbosu proposta lei salariu minimu ne’ebe hahú husi $154 to’o $160 depende ba desizaun,” dehan Assanami hafoin enkontru ho parte SEFOPE ho CCI-TL, iha Palasiu Governu, Kinta (30/04).
Tuir nia, polítika ida ne’e nu’udar parte ida husi kompromisu governu nian atu hadi’a bem-estar traballadór no aborda dinámika ekonomia nasionál.
PM Interinu ne’e mós fó hanoin katak ajustamentu saláriu mínimu ikus liu iha tinan 2012, husi $85 ba $115.
Iha parte seluk, Prezidente CCI-TL, Jorge Serrano hatete, empregadór sira laiha objesaun iha prinsípiu ba proposta aumentu saláriu mínimu, haree ba deliberasaun ne’ebé naruk.
Maibé, nia subliña importánsia atu mantein ekilíbriu entre hadi'a bem-estar traballadór nian no sustentabilidade negósiu nian.
Feliz loron trabaladór
Governu, liu husi PM Interinu, subliña ninia kompromisu atu hadi’a traballadór sira-nia bem-estar, koinside ho komemorasaun Loron Internasionál Traballadór nian ne’ebé monu iha loron 1 Maiu.
Iha ninia mensajen ofisiál iha Palásiu Governu, PM Interinu hato’o ninia apresiasaun ba traballadór Timor-Leste tomak ba sira-nia kontribuisaun ba dezenvolvimentu nasionál.
PM Interinu konsidera, servisu mak baze ba dignidade umana, ba progresu ekonomiku no koezaun sosial, mak traballadór sira, iha to’os, iha eskritóriu, iha eskola, iha ospitál, iha instituisaun públika no setor privadu, ne’ebé loro-loron konstrui Timor-Leste ida ne’ebé forte, justu no prósperu liu.
Lori Governu dasia nia naran, Assanami hato’o agradesimentu ba dedikasaun traballadór sira-nian, no rekoñese dezafiu sira ne’ebé la’o hela iha setór empregu.
Maski nune’e, governu iha kompromisu atu kontinua promove polítika sira ne’ebé apoia kriasaun empregu, hametin formasaun profisionál, no proteje traballadór sira-nia direitu.
“Husi fuan ne’ebe klean, ha’u nia hakuak boot ba imi hotu ne’ebe hari’i ona futuru Timor-Leste, husi imi buat hotu-hotu bele posivel, mai ita hamutuk servisu makas luta ba ita nia futuru iha situasaun ne’ebe nakonu ho sofrimentu, susar no terus nia laran.”
“Feliz Loron Traballadór!” dehan Assanami.