Xefe Suku Uma Kaduak, Fermino Ribeiro da Cruz informa, to’o ohin loron uma-kain 35 ne’ebé hela iha aldeia Ilimanu seidauk asesu eletrisidade.

Fermino konsidera aldeia Ilimau ne’ebé bolu mós ho naran Foho Muzeu ne’e nu’udar fatin istoriku ida ne’ebé loloos merese atu hetan atensaun.

“To’o ohin loron komunidade sira iha aldeia ne’e seidauk asesu eletrisidade,” dehan Xefe Suku ne’e iha nia hela-fatin, Ilimau, Sesta (31/10).

Nu’udar autoridade lokal, Fermino hatete, nia parte esforsu ona hodi hato’o problema ne’e ba parte kompetente, maibé to’o ohin seidauk iha resposta pozitivu.

Maske seidauk iha naroman ba eletrisidade, maibé ho esforsu ne’ebé nia halo, nia konsege hetan apoiu husi UNDP ne’ebé oferese solar panel ba uma-kain sira iha aldeia refere.

“Solar panel ne’e atu aguenta de’it iha tempu kalan,” dehan nia.

Estrada no sentru saude ne’ebé dook

Problema seluk ne’ebé sai preokupasaun boot mak kondisaun estrada ba sira-nia aldeia ne’ebé aat tebes, ho nune’e sira defisil atu asesu ba merkadu no aat liu tan bainhira atu halo tratamentu saude.

“Bainhira iha komunidade balun moras atu ba tratamentu saude ne’e dook tebes. Sira tenke tuun ba Manatuto,” dehan nia.

Situasaun sai defisil liu tan ba inan isin-rua ne’ebé atu partus. Tanba distansia ne’ebé dook no laiha transporte atu tula ba, sira hili liu atu partus iha uma.

“Bainhira inan feto sira kanotak moras entaun partus iha uma de’it,” dehan nia.

Problema bee-moos

Aleinde ne’e, Xefe Suku ne’e hatutan, tanba hela iha laletek ne’ebé aas uitoan, komunidade sira mós hasoru difikuldade ba bee-moos.

"Durante Timor-Leste ukun an komunidade iha aldeia Ilimanu seidauk hetan buat ruma husi governu,” dehan Xefe Suku ne’e.

“Komunidade sira ne'ebé besik bee-matan sira ba kuru bee, maibé komunidade sira ne'ebé hela dook husi bee-matan sira uza masa hodi lalin ba to'o sira-nia hela fatin,” dehan nia.

Atu bele atende problema ne’e, komunidade sira hahú inisiativa tau osan hamutuk hodi sosa paralon atu dada bee ba sira-nia hela fatin.