Ministru Transporte no komunikasaun, Miguel Marques Goçalves Manetelu, nia parte enkoraza Banku sira no mos instituisaun sira seluk bele organiza mos eventu sira-ne’e.
“Tanba ida ne’e hanesan parte imi nia responsabilidade sosial ba ita nia sosiedade, ha’u temi responsabilidade sosial ne’e, tanba kada korporativu sira sempre iha ida ne’e, karik Telemor, Banku no sira seluk tan, ha’u husu para organiza eventu sira ne’e, ita bele para fulan ida, maibe bele kontinua jogu seluk, hodi ita nia joven sira bele konsentra ba atividade sira ne’e, para buat ne’ebe la di’ak iha sira nia ulun, sira bele hases aan husi ne’eba,” Dehan Ministru Manetelu, ba jornalista sira, iha Kampu futsal Bebora, Kuarta (09/07).
Nia mos fo apresisaun ba ekipa sira-ne’ebé partisipa husi inisiu jogu, tanba kualkér kompetisaun sempre iha manan no lakon.
“Se ekipa ne’ebé lakohi lakon di’ak liu lalika partisipa iha kompetisaun para labele lakon, maibe jogu ne’e hahu husi abertura to’o ohin loron la’o ho di’ak no lao iha ambiente ne’ebé seguru no fraternidade, ne’ebé jogu konsege to’o mai ohin loron,”Nia aprofunda.
Nia mos kongratula ekipa sira ne’ebé to’o mai iha final, maibe tenke hanoin katak lakon ohin sei manan iha loron aban.
“Se imi kontinua treinu no esforu, sei la taka dalan katak tinan oin imi sei sai kampiaun, maibé se imi lakon, imi mos lakon vontade la treinu imi lakon ba nafatin,”Nia enkoraza.
Iha fatin hanesan, Prezidente Konsellu Administrasaun BNCTL, Januario Gam informa, jogu ida ne’e la’os jogu kompetisaun, maibe jogu amizade hodi reforsa lasu amizade entre instituisaun no individu sira.
“Se bainhira ita halo kompetisaun, ita nia jogu ne’e sei la mai ho natureza ida disipliña no profesional, tanba ita nia jogu ne’e bele halo sentidu, tanba ne’e mak BNCTL realiza jogu ida ne’e kada tinan sempre halo, atu kontribui ba estabilidade nasional husi jogu sira ne’ebe ita realiza,” Nia informa.
Aleinde ne’e, ema hotu hatene katak BNCTL hanesan Banku Nasional Komérsiu Timor-Leste, banku ida ne’ebe estadu nian banku ida ne’ebe governu ni’an, ne’ebe ajuda diversifika ekonomia rai laran, atu bele redus pobreza iha rai laran.
“Tanba ne’e ita boot sira nia prezensa, hanesan kontribuisaun ida ba dezenvolvimentu instituisaun finanseiru hanesan BNCTL, atu kontinua moris hodi bele fo kondtribuisaun ba ita nia nasaun,”Nia akresenta.
Nia afirma, husi jogu ne’ebe halo husi faze abertura to’o agora, jogu ida ne’ebe mai ho disipliña no profisional no finalmente ekipa tolu husi grupu feto no ekipa tolu husi ekipa mane ni’an , ne’ebe konsege ultrapasa ba 3 klasifikasaun, terseiru klasfikasaun, segundu klasifikasaun no primeiru klasifikasaun.
Nune’e mos, Ministru Juventude, Desportu, Arte no Kultura (MJDAK), Nelyo Isaac Sarmento, hato’o parabéns ba BNCTL tanba toma inisativa ida atu dezenvolve desportu altu rendimentu.
“Ida ne’e hatudu katak, ita atu dezenvolve desportu ne’e hanesan altu rendimentu iha desportu, se setor privadu sira hanesan ne’e involve barak liu tan ho sira nia vontade rasik, hodi apoiu eventu desportu sira, ha’u sente tinan rua ou tolu mai, ita sei hetan atleta ne’ebé kualifikadu ba kompetisaun internasionál,”Nia dehan.
Nia haktuir, jogu ne’e faz parte hanesan jogu komunitariu ida, ne’ebe BNCTL hakarak hatudu ba publiku kona-ba kualidade produtu ne’ebe sira iha no mos hanesan sosializasaun ida ba komunidade katak seguru bainhira rai osan iha banku.
Aleinde ne’e, jogu sira hanesan ne’e, fo oportunidade ba governu hodi fokus ba infraestrutura ba fasilidade desportu, tanba bainhira infraestrutura iha Dili halo di’ak hotu ona, bele dehan atividade sira hanesan ne’e bele halo kada fulan.