Diretór Jerál SNAEM, Simplicio Amaral hatete, relasiona jogu CPLP, Ministériu Saúde prepara ona Ambulánsia 10 resin.

Nia dehan, bainhira la sufisiente mak SNAEM, sei husu apoiu iha parseiru no Klínika privadu sira, maibé kona-ba pesoál saúde sira ne’e Ministériu Saúde prepara hamutuk ema nain 150 hodi halo atendimentu durante jogu CPLP la’o.

“Kona-ba númeru ambulánsia, tanba jogu ne’e hanesan vizita Sua Papa Fransisco nia, nune’e SNAEM prepara Ambulánsia hamutuk 10 ba leten, karik la to’o ita bele husu apoiu ba ita nia parseiru sira, ita nia klínika privadu sira. kona-ba pesoal saúde ne’ebé mak atu koloka ba iha ne’ebá stand by ho veikula ambulánsia la iha problema no totál pesoal saúde ne’ebé mak koloka ne’e mai hosi MS, SNAEM no Instituisaun Saúde sira hotu aprosimamente hamutuk pesoal saúde nain-150,” Dehan nia, ba Jornalista sira iha nia kna'ar fatin, Kaikoli, Segunda (26/05).

Nia dehan, kona-ba jogu CPLP dezde inísiu até agora, ekipa saúde nasionál husi Ministériu Saúde servisu hamutuk ho Komisaun Nasionál ba jogu CPLP liu-liu MJDAK,  to’o agora liña koordenasaun la’o hela.

 “Agora dadauk la’o hela ne’e, ita nia ekipa hosi Ospitál Nasionál Guidu Valadares liu-liu ba Medisina Desportiva nian, hala’o ona sira nia servisu iha Psikolojia, Nutrisaun no Visioterapia sira hala’o dadauk ona, tanba ita nia ekipa delegasaun jogu CPLP Timor-oan agora konsentra ona iha otél Ramelau,” Nia relata.

Tanba ne'e, ekipa saúde tun ona halo fó asisténsia ba sira-nia preparasaun liu-liu haree ba sira ba direta ba sira kondisaun saúde.

“Tanba ne’e mak ekipa saúde tun ona hodi asistensia ba sira nia preparasaun liu-liu haree ba iha sira nia Dieta Nutrisaun, psikolojia ka mentalidade, haree ba sira nia forsa Moskular, rezistensia no halo screaning ba sira nia atividade hotu-hotu antes atu realiza jogu ida ne’e iha 17 de Jullu to’o 25 de Jullu,” Nia relata.

Nia esplika, iha semana kotuk ne’e, ekipa SNAEM ba halo observasaun direita iha fatin jogu CPLP iha estádiu Munisípiu Dili, atu oinsá mak instala postu mediku.

 “Iha semana kotuk ita sai vizita fatin ne’ebé mak atu realiza jogu hamutuk  hitu ne’ebé mak ita identifika ona no depois ita sei instala ita nia medical Camping ka Posku mediku, hodi nune’e Médiku, Infermeiru no CVTL sira bele uza no ita bele asegura ita nia atleta jogu CPLP”, nia esplika.

Entretantu, orsamentu ne’ebé mak Ministériu Finansas aloka ba iha Jogu CPLP nia hamutuk rihun $30.