Prezidente Repúblika, José Ramos Horta informa, klínika prezidensia ne'e hanesan mós iha rai barbarak iha mundu, iha servisu médiku prezidensia nian.

"Iha ne'e fó apoiu ba funsionáriu sira hotu-hotu, família husi funsionáriu, no ema husi li'ur mós presiza mai, simu, laiha problema. Ekipamentu modernu ne'e bele sai hanesan ezemplu ida buat ne'ebé ita bele halo iha rai ne'e," dehan PR Horta ba jornalista sira, hafoin simu ambulansia husi Ministériu Saúde, iha Palásiu Prezidensiál Bairu-Pite, Kinta (13/03).

Nia fó ezemplu, bainhira ba vizita Indonézia dala-ruma tranzitu de'it, hela iha otél, ambulansia ida para iha li'ur, ba Portugál ambulansia ida tuir. Ida ne’e hatudu ema sira-nia organizasaun.

Ba Timor-Leste nian, Horta dehan, nia rasik mak la liga ba buat sira ne'e, maibé dala-ruma derrepenti presiza, maibé liu-liu lorloron fó apoiu ba ema oioin no funsionáriu nia família sira.

"Klaru apoiu tékniku hotu-hotu ne'e mai husi Ministériu Saúde atu haree ekipamentu, haree aimoruk ne'ebé presiza primeira nesésidade. Doutor, pur enkuantu na'in rua, uluk iha ne'e doutor rua mai husi Kuba, enfermeira rua Timor-oan, la hatene see tan mak servisu iha ne'e," dehan Xefe Estadu ne’e.

Iha fatin hanesan, Diretór Jeral Servisu Nasional Ambulansia no Emerjensia Médika (SNAEM,I.P), Simplicio Amaral de Deus informa, MS entrega ambulansia bazeia ba pedidu husi Kaza Sivil Prezidensia Repúblika nian.

Kolokasaun ambulansia ne’e, nia dehan, aleinde atu asegura Prezidente Repúblika ho funsionáriu sira iha Palásiu Prezidensiál, atu asegura mós komunidade sira ne'ebé hela besik.

“Purtantu ninia objetivu ne'e laos atu asegura iha ne'e (de’it), mais asegura mós ita-nia komunidade hotu ne’ebé hela besik iha Palásiu Prezidensiál," katak nia.

Enkuantu, serimónia entrega ambulansia ne'e partisipa husi Primeiru Ministru, Kay Rala Xanana Gusmão, Ministra Saúde Elia dos Reis Amaral, Xefe Kaza Sivil Prezidensia Repúblika Jesuina Maria Gomes, médiku sira no funsionáriu Palásiu Prezidensia Repúblika.