Iha projetu ne’e iha durasaun tinan ida ho orsamentu total hamutuk  tokon $6, ne’ebé sei utiliza atu konstrui no reabilita infraestrutura estrada rural sira-ne’ebé konsidera importante ba mobilidade komunidade no atividade ekonómika lokál.

Intervensaun Ministru Samuel Marçal husu ba kompaña sira atu hala’o servisu ho responsabilidade, garante kualidade  no remata projetu tuir prazu ne’ebé Governu determina ona.

Nia haktuir, Governu la hakarak haree projetu sira ne’ebé abandona no la kumpre padraun tékniku ne’ebé estabelese. Tan ne’e, MOP sei kontinua halo monitorizasaun no fiskalizasaun rigorozu durante implementasaun projetu sira ne’e.

“Kompaña hirak ne’ebé abandona servisu ita sei fó notifikasaun no hapara. Projetu ne’ebé la ho kualidade Governu la sei selu, no kompaña hirak ne’ebé la responsavel sei la hetan oportunidade atu kaer projetu Governu tan,” Informa Ministru Samuel, Kinta (11/06).

Ministru afirma, projetu estrada rural sira ne’ebé hahú ho asinatura kontratu ida ne’e sei fó benefísiu diretu ba komunidade sira, liu husi fasilita movimentu ema no sasán, apoia atividade agrikultura no komérsiu lokal, no hasa’e asesu ba servisu públiku hanesan edukasaun no saúde.

Nune’e, Governu espera katak kompanhia lokal sira bele demonstra profesionalizmu no kapasidade atu implementa obra ho kualidade aas, atu nune’e aumenta konfiansa ba setor konstrusaun nasional no kontribui ba dezenvolvimentu sustentável iha Timor-Leste.