Ministru Justisa, Sergio Hornai, konfirma katak ministeriu forma ona ekipa ne’ebé kompostu husi Diresaun Auditoria no instituisaun relevante sira, molok foti desizaun ba kazu ne’e.
"Sidadaun ne'e nia la halo falsifikasaun, porque dokumentu ne'e iha instituisaun estadu ninian, atu hetan dokumentu ne'e ita tenke liu husi prosesu ida mak ita bele hetan nasionalidade konforme ita-nia lei numeru 9/2002," dehan Ministru ba jornalista sira, iha palasiu governu,Kuarta (07/01).
Ministru ne’e dehan, nia parte sei toma konsiderasaun no halo avaliasaun ho kuidadu. Maibé, se prova katak iha falsifikasaun dokumentus, entaun tenke iha responsabilidade kriminal.
“Maibé se nia ema Timor-oan, nia iha direitu ba iha nasionalidade Timor no iha direitu atu uza dokumentu ofisiál estadu nian. Laiha razaun ida atu fó dokumentu ofisiál ida la liu husi prosesu, no halo ba ema ne'ebé laos merese," nia hatete tan.
Tuir Sergio, lei númeru 9/2002 regula klaru oinsa ema ida bele hetan ka lakon ninia nasionalidade.
"Agora pergunta mak ne'e, nia ema Timor-oan (ka lae)? Se nia ema Timor-oan entaun nia iha direitu atu hetan nasionalidade. Se nia kaer dokumentu seluk ida ne'e labale," dehan nia.
Membru governu ne'e móshusu iha responsabilizasaun ba irregularidade ne'ebéakontese, no agradese ba kontribuisaun media komunikasaun sira hodi halo fiskalizasaun publika.
"Obrigadu ba media komunikasaun sira, imi-nia kontribuisaun maka’as tebes, ita buka par atu bele hadia husi ema rihun ba rihun ne'ebé iha, iha ida mak akontese ita presiza hadia no ita buka hatete tanba saida mak ida ne'e akontese," Katak nia
MJ ne’e garante katak sei prosesa ema ne'ebé mak fasilita sidadaun Indonézia hodi asesu ba pensaun veteranu.
PM Xanana: Entrega ona ba MAKLN
Iha parte seluk, Primeiru Ministru, Kay Rala Xanana Gusmão hatete, sidadaun Indonézia ne’ebé hetan pensaun veteranu entrega ona Ministru Asuntu Kombatente Libertasaun Nasionál (MAKLN).
Kazu ne’e, PM Xanana dehan, iha Kuarta (07/01) Sekretáriu Estadu Komunikasaun Sosiál (SEKomS), Expedito Dias Ximenes, hatama tiha ona iha Konsellu Ministru.
"Ita-boot nia Xefe SEKomS horsehik hatama ona iha Konsellu Ministru, ne'ebé ami entrega tiha ona ba iha Ministru Asuntu Kombatente Libertasaun Nasionál nian. Ne'ebé ha'u labele rezolve buat hotu-hotu, ne'e ka la'e," dehan PM Xanana hafoin enkontru semanál ho PR Horta, iha Prezidensia Repúblika Bairo-Pite, Kinta (08/01).
Molok ne’e, Diresaun Servisu Investigasaun Kriminál, Polisia Nasional Timor-Leste, kaptura sidadaun Indonezia ida ho inisial FN, ne’ebé deskonfia falsifika dokumentus atu sai benefisiariu ba pensaun veteranus.
Diretór Servisu Investigasaun Kriminál Nasionál, Superintendente Polísia João Belo esplika, FN kaptura iha Kuarta (31/12) iha area Batugade, bainhira hakarak fila ba Atambua, Nusa Tenggara Timur, hafoin simu pensaun veteranus.
"Ami-nia informadu infiltra kleur tiha ona ba dadus sira ne'ebé mak deskonfia sidadaun estranjeiru ou falsifikasaun poténsia mosu iha parte ministeriu relevante nian ne'ebé ami akompaña i ami infiltra ami nian servisu informasaun sira hodi rekolla see-see mak halo falsifikasaun sira hanesan ne'e.”
“Ikus mai ami deteta katak senora ne'ebé mensiona ba publikasaun ne'e envolve forte iha faktus katak ema balun husi Timor-Leste fasilita ita-nia inan feton ne'e hodi sai veterna mezmu ke ita-nia lei ida ne'e rasik bandu atu simu pensaun veternu ne'ebé hasai," dehan Jãao ba jornalista sira iha nia kna'ar fatin, Kaikoli, Segunda (05/01).
Tuir João, prosesu identifikasaun deteta katak FN iha dokumentu ofisial Timor-Leste, hanesan Billete Identidade (BI) no kartaun eleitoral, ne’ebé hamosu deskonfiansa parte balun mak apoiu prosesu falsifikasaun refere.
"Agora daudaun nia dokumentu sira ita asegura hela. Agora ita autoriza nia hela ho nia família iha Dili laran, prosesu sei lao," katak nia.
PNTL submete ona kazu ne’e ba Ministeriu Públiku (MP) no suspeita ne'e sei enfreta prosesu judisiál iha Timor-Leste.
"Iha identifikasaun ne'e ami sei buka tuir see-see mak fasilita asaun sira hanesan ne'e," katak nia.
Hakarak lee notisia kompletu no notisia sira seluk tan, asesu link e-paper INDEPENDENTE:https:digital.independente.tl, edisaun sexta (09/01).