Diretór Nasionál Infraestrutura Edukativa,Ministériu Edukasaun, Helio Lopes, hatete, hafoin Jornal INDEPENDENTE públika kona-ba kondisaun eskola refere, ME foti ona asaun no tau ona ba prioridade.

"Ida ne'e sai prioridade ba Ministériu Edukasaun iha tinan ne'e. Dokumentus ba prosesu tomak preparadu, ministériu sei lori ba prosesu aprovizionamentu iha tempu badak ka primeiru trimestre nia laran," dehan nia ba jornalista Jornal INDEPEDENTE, iha nia kna'ar fatin,Vila Verde, Kuarta (11/02).

Tuir nia, ME iha orsamentu atu konstrui eskola refere, tanba nia kondisaun la favoravel ona.

"Alokasaun orsamentu ba eskola ne'e iha ona, no hein de'it prosesu aprovizionamentu iha tempu badak hodi bele tama ba konstrusaun iha tinan ne'e," nia afirma.

Molok ne’e, Koordenadór EBF Mauream, José Isaac Amorin informa, kondisaun edifisiu eskola Ensinu Baziku Filial, Suku Daisua, Postu Administrativu Same, Munisipiu Manufahi, aat ba beibeik. Kakuluk uma balun monu ona, didin ne’ebé taka ho piku lahuk ona, no airin balun mós dodok no monu ona.

Kondisaun ida ne’e halo prosesu aprendizajen iha eskola ne’e la’o iha situasaun ne’ebé la seguru no fó risku ba seguransa estudante sira, inklui mós manorin sira.

José hatete, kondisaun eskola ne’e aat kleur ona no to’o ohin loron seidauk hetan atensaun husi parte kompetente.

Bainhira udan monu rai, bee mata ba sala laran nune’e obrigatoriamente sira tenke haruka estudante sira fila ba uma.

"Eskola ne'e kondisaun at kleur ona, tanba airin balun monu ona, kalen sira balun nakloke hotu ona. Nune'e bainhira udan estudante sira ami haruka iha uma de'it," dehan nia ba jornalista Jornal INDEPEDENTE, via telefone, Sesta (06/02).

Aleinde kondisaun fiziku edifisiu ne’ebé besik monu, limitasaun sala aprendizajen mós sai problema boot ida.

Estudante husi klase 1 to’o klase 6 tenke uza hamutuk sala aula tolu, nune’e sala aula ida klase rua mak uza hamutuk.

Iha sala ida akumula estudante na’in 25 to’o 28, kondisaun ne’e konsidera la kondusivu ba prosesu aprendizajen.

Problema seluk ne’ebé eskola ne’e hasoru mak falta manorin. Husi manorin na’in haat ne’ebé iha, na’in ida sofre moras, nune’e hela na’in tolu mak ativu hanorin estudante sira.

José hatete, nia parte dala-barak ona hato’o proposta ba parte edukasaun munisipiu no Ministeriu Edukasaun, maibé to’o ohin seidauk iha rezultadu.

"Ami haruka bebeik karta ba ministériu, ekipa mai haree ona, maibé to’o agora ami seidauk hetan fali informasaun ruma.Grasa a Deus, ekipa ida husi relijiaun Adventista mak mai ajuda ami, maibé sira troka mak kalen ne'ebé kuak," katak nia.