Diretór Ferreira iha nia intervensaun, hato'o agradesimentu no apresiasaun ba MOIP no KIPA ba sira-nia apoiu tomak hodi harii sistema IP iha Timor-Leste, inklui estabelese Eskritóriu IP.
“Espesifikamente, sorumutu ne’ebe halo durante loron haat ne'e organiza hodi apoia estabelesimentu Eskritóriu Propriedade Intelektual ida-ne'ebé dedikadu iha Timor-Leste atu implementa futuru Kódigu Propriedade Industrial no mos kompromisu internasional Timor-Leste,” Dehan nia liu husi komunikadu ne’ebé online INDEPENDENTE asesu, Segunda (15/06).
Parte bo’ot ida hosi sesaun sorumutu ida ne’e, inklui diskusun sira atu fo asisténsia téknika ho objetivu atu avalia Timor-Leste nia ambiente propriedade intelektuál atuál, hala'o análize institusionál no legál, no dezenvolve enkuadramentu operasionál no sistema servisu ba futuru Eskritoriu IP nian.
Iha biban ida ne’e, Porta-voz husi MOIP, Daesoon Jung mos informa katak inisiativa ida ne'e nia objetivu atu kontribui signifikativamente ba estabelesimentu eskritóriu IP, no fó rekomendasaun estratéjika no prespetiva pratika sira bazeia ba esperiénsia internasionál no prátika di'ak sira.
Durante loron haat ne’e mos, partisipante sira envolve iha sesaun fahe koñesimentu kona-ba konseitu no sistema propriedade intelektuál sira, liuliu ho pesoál tékniku sira husi MCI. Diskusaun sira-ne'e mós foka liu ba identifika prosesu operasionál sira ne'ebé efisiente no espesífiku ba kontestu ne'ebé apropriadu ba Propriedade Intelektual iha Timor-Leste iha futuru.
Adisionalmente, Sorumutu ne’e mos abranje konsulta ho setór privadu atu kompriende hosi perspetiva setór privadu nia parte, no atu hatene di’ak oinsa sistema IP ne’e bele ajuda ambiente negosiu iha rai laran.
Partisipante sira nota katak diskusaun no rekomendasaun sira ne'ebé hamosu durante sorumutu ne'e sei fó fundasaun ida-ne'ebé metin ba faze preparasaun sira tuir mai kona-ba operasionalizasaun Eskritóriu Propriedade Intelektual.
Iha Eventu refere hetan apoiu maximu mos hosi pesoal tékniku sira hosi International Trade Centre (ITC) ne’ebe fo apoiu efetivamente ba servisu dezenvolvimentu sistema IP nian liuhosi koperasaun Estadu Timor-Leste ho Uniaun Europeia (EU)