Ministru Agrikultura, Pekuaria, Peska no Floresta (MAPPF), Marcos da Cruz hatete, iha tinan 2026, MAPPF kompromete sei hadia setór haat, atu nune'e bele atinje mehi ne'ebé iha hodi fornese ai-han ba merkadu no mós ba povu sira nia moris.
“Buat balun ne’ebé ita presija hadia iha tinan oin, ita nia vizaun hanesan ita hotu hatene, orientasaun husi Primeiru-Ministru iha nonu governu ne’e katak, ita tenke buka oinsa mak ita bele fornese ai-han ne’ebé barak, sufisiente ho kualidade no sustentavel, no mós ita tenke orienta ba merkadu, ida ne’e vizaun komun ida ne’ebé ita buka atu dezenvolve setór haat ne’e,”dehan nian ba iha salaun Delta Nova, Segunda ne’e (22/12/25).
Nune’e, Ministru Marcos hatutan, durante tinan ida ne'e nia laran, MAPPF esforsu hala’o servisu barak hamutuk ho parseiru dezenvolvimentuvsira iha rai laran kona-ba setór haat ne'e.
Tan ne’e, ba oin, MAPPF kontinua servisu hamutuk ho parseiru sira atu moderniza setór haat ne’e, hodi fornese aihan ne’ebé kualidade no sustentabilidade ba povu.
“Tanba ne’e mak ita nia programa sira ne’e, ita buka oinsa atu bele atinji ita nia mehi ne’e, ita servisu hamutuk ho parseiru sira, ita uja orsamentu estadu nian, ita buka oinsa mak atu bele moderniza ita nia setór sira ne’e. Moderniza la’ós de’it infresturtura baziku, maibe ita mós tenke providensia ekipamentu no makina modernu sira ne’ebé ita presija hakbit ita nia agrikultura sira hodi bele produz, ita labele obriga sira halo produsaun ho deit ai-suak, katana, no ensada de’it, tamba ne’e mak ita komesa atu moderniza liuhusi providensia ita nia agrikultor sira ho makinas modernu hanesan, traktor no makina kuda haree inklui makina kua haree,”Ministru Esplika.
Nia hatutan, durante ne’e, MAPPF mós hetan apoiu barak husi nasaun sira hanesan Japaun, Xina, Indonesia no Auatralia ba iha dezenvolvimentu setór agrikultura iha Timor-Leste.
Enkuantu, atu moderniza setór agrikultura, maka governu liu husi MAPPF komesa hari ona infraestrutura bázika balun ne’ebé bele benifisia ba agrikultor sira, liuhusi hadia irigasaun sira ne’ebé la funsiona durante tinan naruk.
“Infresturtura báziku mak sai fatór importante ba dezenvolvimentu iha setór agrikultura, tamba ne’e mak ita koko esforsu hari infraestrutura baziku hanesan irigasaun sira, no agora ita halo nafatin. Iha tinan ne’e ita konsege lansa irigasaun 6, foin lalais ne’e iha loron 20 ita halo tan lansamentu ba irigasaun iha mota sahen, maibé antes ne’e ita halo ona iha Maliana 2, ita halo mós iha fatin seluk tan, ne’ebé orsamentu ba tinan ne’e ita konsege halo lansamentu ba irigasaun boot 6, no ita nafatin esforsu atu halo infresturtura baziku ne’e iha tinan oin,”tenik Ministru MAPPF.
Hakarak lee notisias kompletu, asesu deit link e-paper INDEPENDENTE: https://digital.independente.tl, edisaun Tersa (23/12/25) no Pajina Youtube: Independente TV Digital