Iha Sesta (07/11), tuku 11.52 OTL, Prezidente Repúblika, José Ramos Horta, hamutuk ho ekipa Unidade Servisu Sosiédade Sivil no Asuntu Sosiál, entrega direita kadeira roda ne’ebé la’os de’it atu ajuda movimentu, maibé mós simblu liras moris nian—loke odamatan ba Eviana atu sente mundu.

Dezde kiik, Eviana so bele latan de’it iha fatin, labele halo movimentu ho livre, no depende de’it ba nia inan-amana. Ba Eviana ho nia familia, prezensa PR Horta laos de’it simblu atensaun estadu nian, maibé mós enkorajamentu no lembransa katak Eviana la mesak hodi hasoru ninia dezafiu moris.

Bainhira tama ba uma kiik ne’e, PR Horta hase no kaer Eviana nia ulun, hodi hatudu espresaun hanoin ba kondisaun labarik feto ho idade tinan sira ne’e.

“Doutor haree ona?,” PR Horta husu ba Eviana nia inan, Fernanda Fernandes. Inan ne’e esplika katak nia la ba ospital tanba nia kondisaun di’ak hela. “Nia la moras arbiru Prezidente,” dehan nia ho neneik.

Iha dialogu amigavel ne’e, PR Horta koalia mós ho Eviana nia aman, Julito Martins, ne’ebé servisu nu’udar badaen. Nia husu kona-ba kondisaun ekonomia familia no mós sira-nia nesesidade prinsipal iha uma.

Prezidente preokupa bainhira hatene Eviana nia kondisaun ain no liman ne’ebé toos, no mós sira-nia kondisaun uma ne’ebé manas no ventilasaun minimu.

“Plafon la rezolve, ho AC bele. Ha'u iha uma kuak fatin hotu-hotu ho AC kiik oan ida sufisiente,” dehan PR Horta.

Xefe Estadu ne’e mós husu atu ajuda familia ne’e hodi hadia uma kiik ne’e atu iha sirkulasaun anin ne’ebé di’ak liu.

“Presiza osan hira nune'e halo janela tolu. Janela tenke boot uitoan, depois iha oin bele taka de'it,” dehan PR ba Eviana nia inan-aman ne’ebé hatan sira hakarak simu apoiu husi PR Horta.

Koordenadora Unidade Servisu Sosiadade Sivil no Asuntu Sosial, Tereza dos Santos Ximenes esplika katak vizita PR Horta hahú husi informasaun ne’ebé Jornal INDEPENDENTE fó sai. Hafoin hala’o levantamentu, ekipa konklui katak familia ne’e presiza duni hetan apoiu urijente.

“Ami ekipa survey kedas fatin, no haree kedas nia kondisaun no ohin loron Prezidente Repúblika hakat duni mai haree alin Eviana ninia kondisaun moris, família ne'e nia kondisaun moris,” dehan Tereza.

Apoiu ne’ebé oferese ba familia ne’e kompostu husi kadeira roda ida, foos saka lima, mina-sona kaixa ida, no manu-tolun rak lima. Aleinde ne’e PR Horta mós promete atu hadia uma ba familia ne’e.

"Ohin Prezidente Repúblika hatete sei bele apoiu tan hadia nia uma ne'e ho di'ak, nune'e sira bele sente hakmatek, tanba ohin Prezidente Repúblika iha laran rai manas, entaun bele halo família sira ladun sente konfortavel," nia esplika.

Eviana nia inan, sente haksolok tebes simu direita kadeira roda husi PR Horta nia liman.

"Ha'u sente kontente tanba bainhira na'in hira to'o mai iha ne'e ho Prezidente Repúblika. Agora nia hetan ona kadeira roda. Bainhira nia tuur ona hanesan ne'e, ha'u mós sente kontente,” dehan nia.

Entretantu, Xefe Suku Komoro, Eligio José da Silva Marçal hato’o apresiasaun klean ba Prezidente nia prezensa hodi apoiu familia ne’e.

“Prezidente Repúblika rasik mai haree ho matan kondisaun alin feto nian. Oferese ona kadeira roda ida, ho aihan ruma ne'e bele ajuda família ida da ne'e," dehan nia.

Taka ninia vizita, PR Horta ne’ebé kaer hela Eviana nia ulun hodi hatete “Ha’u Prezidente”.  Liafuan simples ne’e nakonu ho signifikadu domin no umanidade.