Prezidente CNE José Agustino Belo hatete, proposta altersaun dalima ba lei numeru 6/2006, loron 28 fulan-dezembru konaba lei eletoral ne’ebé antes ne’e Parlamentu Nasional aprova ona, maibé Prezidente Repúblika la promulga ka veta.
Tanba ne’e, iha tinan oin Komisaun Nasional Eleisoens hanoin atu fó oportunidade ba ema ho defisiensia matan sira atu ezerse sira nia votus ho rasional, liu husi implemetasaun Sistema letra braille.
“Molok ne’e iha ona proposta lei ne'ebé hetan apresiasaun husi Parlamentu Nasionál (PN) maibé tanba kestaun tempu entauN Prezidente Repúblika la konsege promulga. Maibé ita hanoin katak ita fo oportunidade ba ema hotu-hotu, ema hotu tenki responsabilidade ho votus rasional, presiza no komesa hare ba sira ne'ebé defisiénsia matan presiza mós fasilita ho brille ne'e,” dehan Prezidente CNE, iha ambitu vizita no sosializa lei eleisaun kamára munisipál ba kuadrus Partidu CNRT, iha Suku Loro, Postu Administrativu Lospalos, Munisipiu Lautem, Kinta (05/02).
Prezidente CNE mós esplika, dadaun ne’e, CNE hahú halo diskusaun kona ba katuas no ferik sira ne’ebé atu ba vota, presiza ema ne’ebé reprezenta no iha lezitimidade atu lori katuas sira ba urna, atu ezerse sira nia direitu.
Iha fatin hanesan, Kuadru Partidu CNRT husi Postu Lautem, Almerio Monteiro hatete, nia parte preukupa ho eleitor sira ne'ebé maka ho problema defisiénsia matan no ba sira ne'ebé idade ona, durante ne’e la ezerse sira nia direitu ho diak, tanba bainhira familia sira lori eleitor refere ba sentru votasaun, vota la tuir eleitor sira nia hakarak.
"Tanba durante ne'e ami hetan sira ne'ebé kor hanesan mak lori malu, bainhira sira atu tama iha ne'ebá ne'e nia rezultadu orsida la tuir eleitor nia hakarak, tan ne'e presiza hare,”dehan nia.
Entretantu, Kuadru Partidu CNRT ne’e mós rekomenda, atu iha eleisaun sira tuir mai, sira ne’ebé reprezenta lori idozus no ema ho defisiénsia matan sira ba vota tenke oan ka inan-aman rasik mak lori sira bá.
Hakarak lee notisias ne’e kompletu asesu deit iha link e-paper INDEPENDENTE:https://digital.independente.tl, edisaun segunda (09/02), no asesu mós liu husi Pajina Youtube Independente TV Digital edisaun sesta ne’e (06/02).