Reprezentante Kandidatu kadetes foun Polísia Nasionál Timor-Leste, Deolando Yano Mendonça hatete, sira mai iha MI atuhusu klarifikasaun no informasaun loloos kona-ba prosesu rekrutamentu.
Nia hatete, kandidatu hirak ne’e hakarak hatene klaru mekanismu selesaun ne’ebé hala’o no tanba sa Komisaun Rekrutamentu hili de’it kandidatu na’in 400 hodi tuir teste médiku.
“Ami nia naran taka sai ona. Komisaun sira dehan kandidatu sira ho valor total husi 60 ba leten mak bele tuir teste saúde. Maibé ami nia valor liu hotu. Tanba sa mak ami labele tuir teste saúde? Ami haree hanesan diskriminasaun ba ami,” dehan Deolando iha edifisiu Ministériu Interior, Kuarta (04/02).
Tuir buat ne’ebé nia kompriende, kandidatu hotu ne’ebé liu ona teste tenke hetan oportunidade hanesan hodi tuir teste médiku ne’ebé sai nu’udar teste ikus nian.
“Ami la kontente ho rezultadu ida ne’e tanba komisaun hili ema balun ne’ebé mak iha teste fíziku ha’u liu nia, maibé rezultadu ne’ebé fó sai hatudu nia hetan valor aas liu ha’u,” dehan Deolando.
Ba kestaun ne’e, Ministru Interior (MI), Francisco da Costa Guteres esplika, tuir vaga rekrutamentu ne’ebé aprova iha rezolusaun Governu persiza de’it na’in 400.
Nia dehan, total kandidatu ne’ebé tuir teste hamutuk na’in 12.000 no na’in 10 resin mak admitidu iha teste prova kultural, aptidu fiziku, intervista profisional no teste prova psikolojia.
“Kandidatu sira ne’e admitu tuir teste ne’e sira (Komisaun) foti husi ida valor melhores dos melhores. Ida di’ak liu entre ida di’ak mak sira foti, sira tau númeru 01 to’o 400 mak sira foti, tanba ita-nia vaga mak persiza ema na’in 400 de’it,” dehan nia.
Maibé, nia hatutan, Governu sei haree tan oinsa bele aumenta tan númeru vaga hodi bele responde ba kandidatu barak ne’ebé mak tuir teste.
“Agora mak ami tenke haree took ba oin, ami sei halo analiza ba orsamentu no analiza nessidade no situasaun real PNTL no rekursu. Se sei persiza tan, ami sei mai tan aprezenta iha Konsellu Ministru atu bele atribui tan vaga par bele foti tan balun,” Ministru ne’e hatete.
Hakarak lee notisias nee kompletu, asesu deit pajina e-paper INDEPENDENTE: https://digital.independente.tl edisaun kuarta (05/02).