Horta hatete, kanselamentu projetu ne’e la’ós de’it tanba fallansu husi investidor, maibé mós relasiona ho la kumprimentu kompromisu husi parte governu iha tempu kotuk.

Nia esplika, durante tinan hirak ne’e, governu seidauk kumpre obrigasaun sira hanesan fasilidade infraestrutura, inklui eletrisidade no bee iha área projetu.

“Desizaun kansela ne’e di’ak, tanba prosesu ne’e la’o ona tinan 15. La’ós de’it projetu ne’e nia sala, maibé kompromisu sira mós la kumpre,” dehan Horta ba jornalista sira, hafoin fila hikas husi vizita servisu ba Jakarta, Indonézia, Tersa (24/03).

Prezidente subliña, governu presiza prioritiza dezenvolvimentu infraestrutura estratéjiku, liu-liu tanba iha planu atu prepara fasilidade otél fitun 5 no sentru konvensaun hodi suporta simeira ASEAN iha 2029.

“Fatin ne’e governu presiza atu halo hotél 5 estrelas no sentru konvensaun. Ita presiza preparasaun ne’ebé di’ak tanba ita sei simu eventu internasionál boot,” nia hatete.

Horta mós hato’o katak governu bele konsidera uza rai seluk iha Dili no área sira hanesan Hera ne’ebé iha potensial aas ba investimentu, se la hetan utilizasaun husi projetu ne’ebé iha ona.

Nia husu governu atu halo avaliasaun di’ak no uza rai estadu ho maneira efektivu ba dezenvolvimentu nasional.

Iha fatin ketak, organizasaun Luta Hamutuk no Asosiasaun Hak mós konkorda ho desizaun governu.

Diretor Ezekutivu Luta Hamutuk, José Alves da Costa, dehan projetu ne’e la hatudu progresu signifikante no governu iha direitu atu hakotu kontratu.

“Depois tinan 15 laiha konstrusaun ruma, governu iha direitu atu kansela projetu ne’e,” nia dehan, no akresenta katak rai ne’e bele utiliza ba investidor seluk ne’ebé iha kapasidade atu dezenvolve projetu konkretu.

Vise Diretór Asosiasaun Hak, Antonino de Limas, mós suporta desizaun ne’e no husu atu governu buka forma jestaun foun ba área tasi tolu ne’ebé inklui iha planu Pelican Paradise, tanba área ne’e konsidera importante historiku, relijiozu no ekolojiku.

Molok ne’e, Vise Primeiru Ministru, Ministru Koordenadór ba Assuntu Ekonómiku, no Ministru Turizmu no Ambiente, Francisco Kalbuadi Lay hatete, desizaun kanselamentu ne’e mai husi avaliasaun legál no koordinasaun governu nian, no hetan ona aprovasaun prinsipiu husi Primeiru Ministru.

Ho desizaun ne’e, governu espera bele lori rai estadu ba utilizasaun ne’ebé efetivu liu, hodi suporta dezenvolvimentu infraestrutura no prepara Timor-Leste atu enfrenta eventu internasionál boot iha futuru.